На вырашэнне праблем міграцыі неабходна мабілізаваць усе міжнародныя арганізацыі

Большасць удзельнікаў міжнароднай канферэнцыі ААН у Марока выказалася за прыняцце Глабальнага дагавора аб міграцыі, паведамляе Reuters, спасылаючыся на афіцыйную заяву міністра замежных спраў Марока Насера Бурыты, які старшынстваваў на пленарнай сесіі.

У міжнароднай канферэнцыі ААН па міграцыі, якая праходзіла ў Маракешы, прынялі ўдзел прадстаўнікі 159 дзяржаў. Паводле інфармацыі цэнтра навін ААН, 100 дэлегацый былі прадстаўлены на ўзроўні кіраўнікоў дзяржаў, урадаў або міністраў.

Напярэдадні афіцыйнага адкрыцця канферэнцыі генеральны сакратар ААН Антоніу Гутэрыш аб’явіў аб запуску глабальнай сеткі па міграцыі. Залогам яе паспяховага функцыянавання павінны стаць партнёрскія адносіны дзяржаў, а таксама міжнародных інстытутаў. Асноўная задача сеткі — мабілізаваць усе міжнародныя арганізацыі на вырашэнне праблем міграцыі. Цэнтральная роля ў аб’яднанні адводзіцца Міжнароднай арганізацыі па міграцыі. Як адзначыў генеральны сакратар ААН, сетка, маючы гібкую, інклюзіўную структуру, будзе развіваць зладжаную работу розных арганізацый, якія дапаўняюць, а не дубліруюць адна адну.

Кіраўніцтва ААН таксама адзначыла, што Глабальны дагавор аб міграцыі, які распрацоўваўся на працягу 18 месяцаў, з’яўляецца арыенцірам для дзяржаў у іх міграцыйнай палітыцы. Ён прызначаны забяспечыць кіраванне міграцыйнымі патокамі ў інтарэсах як мігрантаў, так і дзяржаў. Пагадненне не з’яўляецца юрыдычна абавязковым. Яго мэта — забяспечыць легальную, бяспечную і рэгулюемую сістэму міжнародных перамяшчэнняў людзей.

Як паведамляе ТАСС, прыняты пакт будзе садзейнічаць змякчэнню неспрыяльных фактараў, якія перашкаджаюць людзям дастойна жыць у сваёй роднай краіне і вымушаюць іх мігрыраваць. Згодна з дакументам, павінна быць узмоцнена консульская абарона мігрантаў. Дагавор таксама паказвае на неабходнасць узмацніць міжнародны адказ на нелегальную перапраўку мігрантаў, прадухіляць дзейнасць сетак, якія займаюцца гандлем людзьмі, забяспечыць абарону граніц, а таксама выразнасць і прадказальнасць міграцыйных працэдур.

Да гэтага часу шэраг краін адмовіліся далучыцца да Глабальнага дагавора аб міграцыі. У іх ліку — ЗША, Аўстралія, Аўстрыя, Балгарыя, Венгрыя, Ізраіль, Італія, Польшча, Чэхія, Эстонія.