Абласны навагодні баль сабраў таленавітую моладзь з усёй Гомельшчыны ў абласным цэнтры. На другім абласным навагоднім балі ўшаноўвалі лепшых прадстаўнікоў устаноў агульнай сярэдняй і прафесійнай адукацыі рэгіёна: пераможцаў алімпіяд, музычных, творчых і спартыўных спаборніцтваў.
Дэбютанткай свецкага раўту стала дзесяцікласніца лельчыцкай школы № 2, прызёр алімпіяды па беларускай мове, літаратурных конкурсаў Дзіяна Краўчэня. Дзяўчына расказала, што паездцы на баль папярэднічалі рэпетыцыі ў сваёй школе. Доўга выбіралі сукенку. Спачатку думалі ўзяць напракат, але потым вырашылі, што трэба купіць, каб яна доўгія гады нагадвала пра яркую падзею.
— Гледзячы на дзяўчат у сукенках да падлогі, кавалераў у строгіх касцюмах, слухаючы музыку мінулых стагоддзяў, як быццам пераносішся ў мінулыя стагоддзі. Прыемна прачуць такую атмасферу, хоць у той жа час гэта вельмі хвалююча, — дзеліцца ўражаннямі дзяўчына.
Вучню сярэдняй школы № 2 Рэчыцы дзесяцікласніку Івану Блізняцу цяперашні год прынёс поспехі і ў вучэбнай, і ў грамадскай дзейнасці:
— Было радасна атрымаць запрашэнне на баль. А вось падрыхтоўка да яго была няпростай — я ж не танцор. Складаней за ўсё далася полька. Але ўсё адрэпеціравалі, вывучылі.
Дарэчы, пачатак традыцыі праводзіць баль для таленавітай моладзі вобласці быў пакладзены летась. Словы віншаванняў ад імя старшыні аблвыканкама Генадзя Салаўя перадала моладзі кіраўнік спраў аблвыканкама Алена Клічкоўская:
— Сваімі поспехамі вы славіце нашу гомельскую зямлю. Хачу вам пажадаць, каб 2021 год прынёс шмат прафесійных дасягненняў, каб спраўдзіліся мары. Пры гэтым вельмі прашу: не забывайце пра сваіх бацькоў і педагогаў — людзей, якія дапамаглі вам стаць тымі, кім мы сапраўды ганарымся.
Пяцідзесяці навучэнцам устаноў агульнай сярэдняй, прафесійна-тэхнічнай і сярэдняй спецыяльнай адукацыі былі ўручаны прэміі Гомельскага аблвыканкама. Маладыя людзі ў фае Гомельскага грамадска-культурнага цэнтра танцавалі вальс, паланэз, польку пад музыку ў выкананні камернага аркестра Гомельскай абласной філармоніі. Віншаванні дзецям адрасавалі артысты вобласці і, вядома ж, Дзед Мароз і Снягурка. Абласны навагодні баль стаў часткай рэспубліканскай дабрачыннай акцыі “Нашы дзеці”.
Ірына АСТАШКЕВІЧ.
Фота аўтара.
