Нацыянальная стратэгія — 2035 будзе сфарміравана да канца года

Нацыянальная стратэгія ўстойлівага развіцця Беларусі да 2035 года будзе сфарміравана да канца 2019 года, заявіў на першым Нацыянальным форуме па ўстойлівым развіцці прэм’ер-міністр Сяргей Румас.

“Выбудавана работа ў напрамку імплементацыі Мэт устойлівага развіцця ў стратэгічныя і праграмныя дакументы краіны. Ужо ў бягучым годзе будзе сфарміравана Нацыянальная стратэгія ўстойлівага развіцця краіны да 2035 года. Гэты дакумент стане сувязным звяном паміж прыярытэтамі ўстойлівага развіцця на нацыянальным узроўні і глабальнымі мэтамі ў гэтай галіне”, — адзначыў Сяргей Румас.

Паводле слоў прэм’ер-міністра, пытанні рэалізацыі парадку дня ААН і дасягнення МУР з’яўляюцца важным дзяржаўным прыярытэтам і знаходзяцца ў цэнтры ўвагі Савета Міністраў.

Распрацоўваецца шэраг стратэгічных дакументаў, іх рэалізацыя дапаможа ва ўстойлівым развіцці лясной гаспадаркі, турызму, забяспечыць гарманізацыю нацыянальных стандартаў з міжнароднымі.

“З улікам патрабаванняў парадку дня ў галіне ўстойлівага развіцця ўжо скарэкціравана амаль палова дзеючых у краіне дзяржаўных праграм. Больш за тое, з 1 лютага гэтага года падрыхтоўка любога нарматыўнага прававога акта будзе ажыццяўляцца з улікам усебаковага і аб’ектыўнага прагнозу магчымых наступстваў яго прыняцця, уключаючы адпаведнасць Мэтам устойлівага развіцця. Такое рашэнне ўрад прыме ўжо ў найбліжэйшы час”, — дадаў Сяргей Румас.