Арганізацыя вучэбна-выхаваўчага працэсу ва ўстановах адукацыі і сустрэчы з педагогамі былі ў цэнтры ўвагі Андрэя Іванца падчас наведвання Верхнядзвінскага раёна Віцебскай вобласці, паведамляе карэспандэнт “Настаўніцкай газеты”.
Асноўным пунктам для наведвання стала сярэдняя школа № 2 Верхнядзвінска імя Героя Савецкага Саюза Н.В.Траян, дзе міністр адукацыі сустрэўся з педагагічным калектывам, азнаёміўся з арганізацыяй адукацыйнага працэсу, наведаў вучэбныя кабінеты, харчаблок, школьны гісторыка-краязнаўчы музей, цэнтр дапрызыўнай падрыхтоўкі.
Новыя магчымасці для арганізацыі адукацыйнага працэсу ўстанова адукацыі атрымала ў 2018 годзе, калі адбыўся капітальны рамонт і мадэрнізацыя. У выніку будынак стаў яшчэ і энергаэфектыўным: сонечныя панэлі, устаноўленыя на даху школы, забяспечваюць яе гарачай вадой, а ўцепленыя сцены ў міжсезонне даюць магчымасць мець камфортную тэмпературу.
У 2-й школе Верхнядзвінска вучацца 503 чалавекі, з якіх на I ступені агульнай сярэдняй адукацыі — 195, на II — 261, на III — 47 навучэнцаў. Адукацыйны працэс забяспечвае 51 педагог, з якіх 23 настаўнікі — выпускнікі гэтай школы розных гадоў. Сярод педагогаў трое з’яўляюцца лаўрэатамі абласнога этапу конкурсу прафесійнага майстэрства “Настаўнік года Рэспублікі Беларусь”.
Педагогі ганарацца сваімі адоранымі і таленавітымі навучэнцамі. Сярэдняя школа № 2 Верхнядзвінска займае лідзіруючыя пазіцыі ў раённай круглагадовай спартакіядзе і з’яўляецца раённай базай для падрыхтоўкі спартсменаў да абласных і рэспубліканскіх спаборніцтваў.
Акрамя таго, тут створаны выдатныя ўмовы для набыцця працоўных навыкаў. Для ўсіх навучэнцаў школ раёна, якія вывучаюць вучэбныя прадметы на базавым узроўні, у рамках вучэбнага прадмета “Працоўнае навучанне” арганізавана прафесійная падрыхтоўка па прафесіях сталяр і швачка з выдачай пасведчання аб прысваенні 2-га кваліфікацыйнага разраду.
Да таго ж школа абсталявана станкамі з лічбавым праграмным абсталяваннем. Ёсць лазерна-гравіравальны, фрэзерны станкі і 3D-прынтар, што дазваляе вучыць дзяцей з дапамогай камп’ютарнай праграмы, ствараць трохмерны дызайн аб’екта і ператвараць віртуальную мадэль у рэальны аб’ект. У рамках шостага школьнага дня аб’яднанне па інтарэсах “Тэхнічнае мадэляванне” наведваюць і навучэнцы з іншых школ Верхнядзвінскага раёна.
Характэрнай рысай сярэдняй школы № 2 Верхнядзвінска з’яўляецца гнуткая дыферэнцыяцыя, шырокі выбар напрамкаў навучання. Сёння вучні для вывучэння на павышаным узроўні могуць выбраць матэматыку, хімію і біялогію, рускую, беларускую, англійскую мовы.
Працуюць таксама аб’яднанні па інтарэсах інтэлектуальнай і творчай накіраванасці, спартыўныя секцыі. Вучні школы — актыўныя ўдзельнікі прадметных алімпіяд, творчых конкурсаў, мастацкіх выстаў, фестываляў, спартыўных спаборніцтваў раённага і абласнога ўзроўню.
Змястоўнай стала сустрэча міністра адукацыі з кіраўнікамі ўстаноў адукацыі Верхнядзвінскага раёна, падчас якой былі абмеркаваны актуальныя пытанні адукацыйнага працэсу, вынікі рэпетыцыйнага ЦЭ, ступень гатоўнасці да правядзення цэнтралізаванага экзамену, уступнай кампаніі, далейшага функцыянавання ўстаноў адукацыі, якасці адукацыі, падрыхтоўкі спецыялістаў.
Асаблівая ўвага была ўдзелена пытанням выхавання дзяцей і моладзі, прафілактыцы сямейнага недабрабыту, супрацьпраўных паводзін. Міністр падкрэсліў, што ў вырашэнні гэтых пытанняў ключавая роля адводзіцца педагогу, які павінен быць уважлівым да кожнага дзіцяці.
Увогуле, у 2022/2023 навучальным годзе ў Верхнядзвінскім раёне функцыянуе 29 устаноў адукацыі, сацыяльна-педагагічны цэнтр, Цэнтр карэкцыйна-развіццёвага навучання і рэабілітацыі, Верхнядзвінскі раённы цэнтр дзяцей і моладзі, раённы вучэбна-метадычны кабінет. У сістэме адукацыі раёна працуе 851 чалавек.
Штогод у раёне адкрываюцца групы педагагічнай накіраванасці. Па выніках уступнай кампаніі 2022 года 14 выпускнікоў 11-х класаў і 13 выпускнікоў 9-х класаў паступілі на педагагічныя спецыяльнасці ў профільныя ўстановы адукацыі краіны. З іх па дагаворах аб мэтавай падрыхтоўцы — 12.
Адным з прыярытэтных напрамкаў работы ва ўстановах адукацыі вызначана грамадзянска-патрыятычнае выхаванне. У 2022/2023 навучальным годзе чатыром установам адукацыі Верхнядзвінскага раёна прысвоены імёны герояў Савецкага Саюза, знакамітых землякоў. У трох установах створаны і працягваюць развівацца школьныя музеі, плануецца адкрыццё музейнага пакоя, прысвечанага ваенна-марскому флоту. У школах раёна актыўна ажыццяўляецца турыстычна-краязнаўчая і экскурсійная дзейнасць.
Па матэрыялах сайта Мінадукацыі падрыхтавала
Вольга ДУБОЎСКАЯ
Фота з сайта школы
