Працягваецца падрыхтоўка ўстаноў адукацыі Мінска да новага навучальнага года. Асаблівая ўвага ўдзяляецца пытанням бяспечнага знаходжання дзяцей, прапускнога рэжыму, кадравага забеспячэння, выканання санітарна-эпідэміялагічных патрабаванняў, работы харчаблокаў. Усе школы і гімназіі павінны ў тэрмін атрымаць сертыфікаты гатоўнасці, расказалі карэспандэнту “Настаўніцкай газеты” ў камітэце па адукацыі Мінгарвыканкама.
Там дадалі, што аб’ём фінансавання на падрыхтоўку ўстаноў адукацыі сталіцы да навучальнага года штогод павялічваецца. Усяго на ўмацаванне матэрыяльна-тэхнічнай базы ўстаноў бюджэтам у бягучым годзе прадугледжана накіраваць 148 мільёнаў рублёў, з іх 60 мільёнаў — на капітальны рамонт, 77 мільёнаў — на бягучы рамонт. Таксама выдзелены сродкі на закупку абсталявання.
1 верасня расчыніць дзверы школа-новабудоўля ў жылым раёне Лябяжы, а таксама дзіцячы сад на 190 месцаў у Фрунзенскім раёне ў межах вуліц Прытыцкага — Скрыпнікава — Адзінцова — Лабанка.
Новая школа ў Лябяжым разлічана на 1020 месцаў. Будаўнічыя работы выходзяць там на фінішную прамую. Ужо завершана ўладкаванне падпорных сценак, мантаж агароджаў і ўстаноўка супрацьшумавых экранаў. Каб кожны навучэнец мог знайсці сабе занятак па душы, ствараецца развітая спартыўная інфраструктура. Школьны стадыён і басейн з нецярпеннем чакаюць юных спартсменаў. На цокальным паверсе будынка будзе абсталяваны цір. Зараз практычна на ўсім аб’екце на змену аддзелачнікам прыйшлі наладчыкі, каб усё запусціць і праверыць.
Таксама праводзяцца капітальныя і бягучыя рамонты ўстаноў адукацыі. Тры ўстановы агульнай сярэдняй адукацыі пасля капітальнага рамонту ўведзены ў эксплуатацыю, сем яшчэ плануецца ўвесці. У рамках бягучага рамонту адрамантаваны 13 харчаблокаў, 23 санвузлы, 7 спартыўных залаў. У 28 установах абнавілі асфальтабетоннае пакрыццё, у 75 — праводзіцца замена аконных блокаў. Выконваецца рамонт дахаў, фасадаў, добраўпарадкаванне тэрыторый, стадыёнаў, спартыўных пляцовак. Пры неабходнасці праводзіцца замена футбольных варот, баскетбольных кольцаў і інш. Для ўстаноў адукацыі набываецца вучэбнае, гандлёва-тэхналагічнае абсталяванне і інш.
Сярод устаноў адукацыі сталіцы, якія падлягаюць капрамонту, ёсць шэраг пераходных аб’ектаў. Так, у сярэдняй школе № 4 Ленінскага раёна да будаўніча-мантажных работ ужо прыступілі, але завяршыць іх плануецца ў наступным годзе. Для школы № 63 Першамайскага раёна вызначана падрадная арганізацыя для правядзення капрамонту, які, як чакаецца, таксама будзе выкананы ў наступным годзе.
Школы і дашкольныя ўстановы Мінска таксама праходзяць комплексную падрыхтоўку да маючага адбыцца ацяпляльнага сезона. Атрымаць пашпарты гатоўнасці да зімы ім неабходна ў тэрмін да 15 жніўня.
Усе школы і гімназіі Мінска з 1 верасня пяройдуць на новыя ўмовы арганізацыі харчавання. У сталовых павялічыцца ўмяшчальнасць абедзенных залаў, што дазволіць школьнікам харчавацца ў рацыянальны для ўсіх час. Зараз ва ўстановах адукацыі ўстанаўліваюць новае гандлёва-тэхналагічнае абсталяванне, якое дасць магчымасць адначасова гатаваць больш порцый. Парадуюць школьнікаў і новымі пазіцыямі ў меню. Пры яго складанні ўлічваліся як смакавыя перавагі дзяцей, так і збалансаванасць рацыёну.
Па словах намесніка старшыні камітэта па адукацыі Мінгарвыканкама Вольгі Смірновай, у сталічных школах у новым навучальным годзе адкрыецца 859 1-х класаў, дзе будуць вучыцца больш за 22 тысячы дзяцей. Таксама плануецца сфарміраваць 512 10-х класаў, пры гэтым 62% з іх будуць профільнымі.
Тэндэнцыя апошніх гадоў — большасць профільных класаў маюць прафесійную накіраванасць. Летась установы адукацыі горада працавалі па пяці напрамках. У гэтым годзе іх будзе шэсць: педагагічны, спартыўна-педагагічны, ваенна-патрыятычны, аграрны, інжынерны і новы медыцынскі. Самы вялікі прарыў — гэта інжынерныя класы. Сёлета іх колькасць набліжаецца да 60. Гэты профіль выбралі 1358 дзяцей, што ў чатыры разы больш, чым у мінулым годзе. Развіваецца сетка педагагічных класаў, дзе, як чакаецца, будуць вучыцца больш за 1200 школьнікаў. Таксама адкрываюцца класы ваенна-патрыятычнай накіраванасці — з верасня яны прымуць звыш 2000 чалавек. У 10-я класы спартыўнай накіраванасці прыйдуць больш за 150 хлопцаў і дзяўчат. Павялічылася колькасць навучэнцаў аграрных класаў. Летась былі адкрыты тры аграрныя класы, сёлета чакаецца чатыры. Агульная колькасць навучэнцаў у іх набліжаецца да 100. Для якаснага адукацыйнага працэсу ў класах прафесійнай накіраванасці наладжана ўзаемадзеянне з установамі вышэйшай адукацыі. Навучанне па профілі ў будучыні забяспечвае пэўныя льготы пры паступленні.
Наталля КАЛЯДЗІЧ
Фота Алега ІГНАТОВІЧА
