Новы дом для новай сям’і

Адразу 3 дзіцячыя дамы сямейнага тыпу адкрыліся ў лістападзе на Брэстчыне: у аграгарадку Мірны Баранавіцкага раёна, Івацэвічах і Баранавічах.

Бацькі-выхавальнікі Надзея Мікалаеўна і Уладзімір Мікалаевіч Якубовіч з аграгарадка Мірны ўжо маюць двух уласных дзяцей 6 і 17 гадоў. Цяпер сямейная пара стала прыёмнымі бацькамі для 6 дзяцей ва ўзросце ад 3 да 14 гадоў.
Дом, агульная плошча якога складае амаль 200 м2, узведзены на сродкі абласнога і рэспубліканскага бюджэту. На будаўніцтва дома было затрачана каля 2 млрд рублёў.
Старшыня Брэсцкага аблвыканкама К.А.Сумар, які прыняў удзел ва ўрачыстай цырымоніі адкрыцця дома, адзначыў важнасць і значэнне гэтай падзеі як для дзяржавы, так і для канкрэтнай сям’і.
— Гэта дарагога варта, але не ў плане грошай, а ў тым сэнсе, што, набываючы сямейны ачаг і ўтульнасць, дзеці вырастуць дастойнымі членамі грамадства, адбудуцца як грамадзяне і, самае галоўнае, не счарсцвеюць душой, — заўважыў кіраўнік вобласці.
К.А.Сумар паведаміў, што на Брэстчыне планамерна ўвасабляюць у жыццё прэзідэнцкую праграму па ўладкаванні дзяцей-сірот і дзяцей, якія засталіся без бацькоўскай апекі, на сямейныя формы выхавання. Сёлета ў вобласці былі пабудаваны 4 дзіцячыя дамы сямейнага тыпу. Да канца года такі дом адкрыецца і ў Маларыце. У наступным годзе запланавана будаўніцтва яшчэ чатырох дамоў — у Брэсце, Івацэвіцкім і Пінскім раёнах.
Сёння на Брэстчыне функцыянуюць 36 дзіцячых дамоў сямейнага тыпу, дзе выхоўваюцца 229 дзяцей. 660 непаўналетніх выхоўваюцца ў 475 прыёмных сем’ях, 1186 — у 978 апякунскіх. А ўсяго ў вобласці пражываюць 2974 дзяцей-сірот і дзяцей, якія засталіся без бацькоўскай апекі.
К.А.Сумар падзякаваў сям’і Якубовіч за падзвіжніцтва, а ў іх асобе і ўсім бацькам вобласці, якія ўзялі на сябе місію па выхаванні дзяцей, што аказаліся ў цяжкай жыццёвай сітуацыі. Кіраўнік Брэстчыны ўручыў навасёлам камп’ютар, а старшыня Баранавіцкага райвыканкама В.М.Хвацік падарыў мнагадзетнай сям’і пасудамыечную машыну.

Сяргей ГРЫШКЕВІЧ.