Рэспубліканскае свята “Маладзёжная сталіца Рэспублікі Беларусь — 2019” праходзіць з 27 лютага па 1 сакавіка ў Оршы Віцебскай вобласці.
Маладзёжная сталіца 2019 года пачынае сваю работу з выставы-прэзентацыі. Наведвальнікі змогуць азнаёміцца з дасягненнямі ўстаноў адукацыі Аршанскага раёна, устаноў вышэйшай адукацыі Віцебскай вобласці ў сферы маладзёжнай палітыкі і спорту, рухам WorldSkills International, “WorldSkills — старт у будучыню!”. Праект “100 ідэй для Беларусі” прадставіць інавацыйныя напрацоўкі, у тым ліку моладзі Оршы. Асобная экспазіцыя будзе прысвечана развіццю маладзёжнага турызму. Гэта асабліва важна ў Год малой радзімы. Інтэрактыўная экспазіцыя “Грані творчасці” раскрые, наколькі таленавітая наша моладзь.
На інтэрактыўных пляцоўках Рэспубліканскага форуму “#Беларусь. Моладзь. Будучыня” маладыя людзі абмяркуюць праект стратэгіі развіцця маладзёжнай палітыкі да 2030 года, выпрацуюць падыходы па ўдасканаленні дзейнасці пярвічных арганізацый БРСМ ва ўстановах вышэйшай адукацыі, абмяркуюць пытанні ўдзелу органаў студэнцкага самакіравання ў павышэнні якасці адукацыйнага працэсу.
Орша дасць старт рэспубліканскім праектам: фестывалю мастацкай творчасці навучэнскай моладзі “АРТ-вакацыі” і фестывалю творчасці замежных студэнтаў, якія вучацца ва ўстановах вышэйшай адукацыі Рэспублікі Беларусь, F.-ART.by.
Традыцыйна моладзь сустрэнецца з міністрам адукацыі Рэспублікі Беларусь Ігарам Васільевічам Карпенкам.
Фота Юліі Бачкаровай,
Ігара ГРЭЧКІ
і Таццяны БОНДАРАВАЙ.