Пачалося цэнтралізаванае тэсціраванне

12 чэрвеня ў краіне пачалося цэнтралізаванае тэсціраванне. Традыцыйна першым абітурыенты здавалі экзамен па беларускай мове. Сёлета на гэты прадмет зарэгістраваліся амаль 25 тысяч чалавек.

Па запрашэнні Камітэта дзяржкантролю ў першы дзень ЦТ мы наведалі пункт тэсціравання ў Беларускім дзяржаўным універсітэце інфарматыкі і радыёэлектронікі. Сюды, каб падтрымаць абітурыентаў у такі важны момант, прыехаў і намеснік прэм’ер-міністра старшыня дзяржаўнай камісіі па кантролі за ходам падрыхтоўкі і правядзення ўступных выпрабаванняў ва ўстановах вышэйшай і сярэдняй спецыяльнай адукацыі Васіль Жарко. Ён пажадаў маладым людзям максімальна праявіць свае веды і стаць студэнтамі тых спецыяльнасцей, пра якія яны мараць.

Нагадаем: у гэтым годзе на цэнтралізаванае тэсціраванне зарэгістравалася 82 471 чалавек. Палова з іх маюць намер здаваць 4 тэсты. Каля 14% абітурыентаў выбралі для здачы дзве дзяржаўныя мовы.

14 чэрвеня абітурыенты выпрабуюць свае веды на ЦТ па рускай мове, на якое зарэгістраваліся амаль 67 тысяч чалавек.

Галіна СІДАРОВІЧ.
Фота Алега ІГНАТОВІЧА.

Пакінуць каментарый

Ваш электронны адрас не будзе апублікаваны. Абавязковыя палі пазначаны *