29—30 лістапада Мінск прымаў удзельнікаў V Беларускіх калядных чытанняў “Вялікая Перамога: спадчына і спадчыннікі”. У 75-ю гадавіну вызвалення Беларусі ад нямецка-фашысцкіх захопнікаў і напярэдадні юбілею Вялікай Перамогі святары, педагогі, прадстаўнікі органаў улады, дзеячы культуры, навукоўцы, медыцынскія і сацыяльныя работнікі, выкладчыкі нядзельных школ, навучэнцы, студэнты абмяркоўвалі гісторыю царквы, яе патрыятычную дзейнасць у Вялікую Айчынную вайну, сённяшнюю ролю ў духоўна-маральным выхаванні грамадства, асабліва моладзі.

Калядныя чытанні па традыцыі з’яўляюцца маштабнай падзеяй, у рамках якой сёлета ладзіліся канферэнцыі, круглыя сталы, выставы, канцэрты, была арганізавана работа васьмі секцый, прайшлі ўрачыстыя цырымоніі ўзнагароджання пераможцаў конкурсу дзіцячага малюнку “Прыгажосць Божага свету”, а таксама конкурсаў “Бібліятэка — асяродак духоўнай асветы і выхавання” і “За маральны подзвіг настаўніка”. Чытанні — гэта пляцоўка, на якой абмяркоўваюцца пытанні супрацоўніцтва царквы і дзяржавы. Шмат гадоў такое супрацоўніцтва паспяхова развіваецца і ў сферы інфармацыі. Адметнай падзеяй сёлетніх чытанняў стала падпісанне новага пагаднення аб супрацоўніцтве паміж Беларускай Праваслаўнай Царквой і Міністэрствам інфармацыі. Па словах кіраўніка ведамства Аляксандра Карлюкевіча, мэтай пагаднення з’яўляецца фарміраванне дабратворнага інфармацыйнага асяроддзя, развіццё асобы і грамадства ў адпаведнасці з духоўнымі, культурнымі, нацыянальнымі традыцыямі і каштоўнасцямі нашай дзяржавы, беларускага грамадства.

“Сёлетнія чытанні прысвечаны важнай тэме, якая на беларускай зямлі набывае асаблівае гучанне. Без перабольшання ўвесь беларускі народ з’яўляецца спадчыннікам перамогі ў Вялікай Айчыннай вайне, ён панёс найбольшыя страты. Уся Беларусь усыпана месцамі смутку, якія нагадваюць пра злачынствы гітлераўскага акупацыйнага рэжыму. Уся беларуская зямля авеяна воінскай славай, захоўвае памяць пра по­дзвіг, здзейснены воінамі і простымі людзьмі. Подзвіг — гэта доля моцных людзей. Пра гэта варта помніць і нагадваць заўсёды, асабліва калі гаворка ідзе пра духоўна-маральнае і патрыятычнае выхаванне падрастаючага пакалення. Каб на зямлі панаваў мір, нам неабходна захоўваць мір у сваіх сэрцах”, — адзначыў Мітрапаліт Мінскі і Заслаўскі Павел, Патрыяршы Экзарх усёй Беларусі.

У галіне супрацоўніцтва Беларускай Праваслаўнай Царквы з органамі сацыяльнай сферы склалася шмат добрых традыцый, у ліку якіх і правядзенне конкурсу сярод педагогаў “За маральны подзвіг настаўніка”. Конкурс праводзіцца па ініцыятыве Беларускага Экзархата пры падтрымцы Міні­стэрства адукацыі. Яго мэтай з’яўляецца стымуляванне творчасці педагогаў і выхавальнікаў устаноў адукацыі, ня­дзельных школ, заахвочванне іх за шматгадовае духоўна-маральнае выхаванне дзяцей і моладзі, павышэнне прэстыжу настаўніцкай працы.

Сярод узнагароджаных намеснік дырэктара па выхаваўчай рабоце Жыровіцкай сярэдняй школы Слонімскага раёна А.І.Бякрэнь, педагог-псіхолаг гімназіі № 2 Пінска Г.А.Свірыдэнка, выхавальнік-метадыст ясляў-сада № 77 Гродна С.В.Рэзнік, настаўніца рускай мовы і літаратуры сярэдняй школы № 1 Дзятлава В.М.Старыкава, настаўніца гісторыі Валеўскага дзіцячага сада — сярэдняй школы Навагрудскага раёна Т.М.Сурага, дырэктар сярэдняй школы № 3 Івацэвіч А.А.Кузьмін, намеснік дырэктара па вучэбнай рабоце пачатковай школы № 1 Беразіна Т.І.Яфіменка, настаўніца пачатковых класаў сярэдняй школы № 4 Калінкавіч А.В.Андрыеўская, настаўніца рускай мовы і літаратуры № 191 Мінска І.В.Моніч.

“Самая прыемная місія — узнагароджваць тых, хто працуе на карысць айчыны, царквы, на радасць людзям. Здаецца, дыплом, кветкі — усё сімвалічна, а колькі за гэтымі знакамі ўвагі хаваецца вашай працы, вашага подзвігу. Гэта сапраўды подзвіг, плады якога будуць прыносіць вынік праз пэўны час. Подзвіг настаўніка — гэта асаблівы подзвіг. Гаворачы сучаснай мовай, ваша праца — гэта доўгатэрміновая інвестыцыя. Пра вас будуць заўсёды ўспамінаць, гэтак жа, як і мы, старэйшае пакаленне, прыгадваем сваіх настаўнікаў, хто даваў нам веды, дапамагаў правільна асэнсоўваць жыццё, ацэньваць тыя ці іншыя абставіны. Ваша праца будзе запатрабавана заўсёды”, — адзначыў мітрапаліт Павел.

Ад імя ўзнагароджаных выступіла намеснік начальніка цэнтра ідэалагічнай, выхаваўчай і сацыяльнай работы Гро­дзенскага абласнога інстытута развіцця адукацыі Л.А.Кіўлюк: “Удзельнікі конкурсу з’яўляюцца часцінкай у незвычайным аркестры, які выконвае боскую сімфонію любові і міру. Нехта з’яўляецца кампазітарам, нехта дырыжорам, нехта таленавітым выканаўцам. Няхай гэтая сімфонія любові і міру гучыць так, каб яе пачулі не толькі сённяшняе, але і будучыя пакаленні, каб нашы плады былі сапраўды дастойнымі”.

Нагадаем, Беларускія калядныя чытанні арганізоўваюцца Беларускай Праваслаўнай Царквой пры падтрымцы Міністэрства культуры, Міністэрства адукацыі, Міністэрства аховы здароўя, Міністэрства працы і сацыяльнай абароны, Нацыянальнай акадэміі навук, Нацыянальнай бібліятэкі Беларусі.

Ігар ГРЭЧКА.
Фота аўтара.