Паглыбленне кааперацыі ў навукова-тэхнічнай і інавацыйнай сферах мае першараднае значэнне для развіцця саюза

Укараненне інавацыйных тэхналогій у аграпрамысловы комплекс краін Еўразійскага эканамічнага саюза (ЕАЭС) павінна быць паскорана. Аб гэтым заявіў член Калегіі (міністр) па прамысловай і аграпрамысловай палітыцы Еўразійскай эканамічнай камісіі (ЕЭК) Сяргей Сідорскі на каардынацыйнай нарадзе Еўразійскай сельскагаспадарчай тэхналагічнай платформы, паведамілі ў прэс-службе ЕЭК.

На думку міністра ЕЭК, дзейнасць Еўразійскай сельскагаспадарчай тэхналагічнай платформы павінна быць накіравана на мабілізацыю навуковага патэнцыялу для сумеснага вырашэння першарадных задач у сельскай гаспадарцы краін ЕАЭС. “Гэта ў канчатковым выніку дасць магчымасць распрацаваць інавацыйныя прадукты і ўкараніць іх у АПК. Наша мэта ў тым, каб увесь ланцужок дабаўленых вартасцей максімальна праводзіўся ў саюзе”, — сказаў ён.

Сяргей Сідорскі адзначыў, што паглыбленне кааперацыі ў навукова-тэхнічнай і інавацыйнай сферах мае першараднае значэнне для развіцця саюза. Цяпер удзельная вага высокатэхналагічных вытворчасцей у краінах ЕАЭС не перавышае 4%. Неабходна апераджальнымі тэмпамі ўкараняць інавацыйныя распрацоўкі ў аграпрамысловы комплекс саюза, каб павысіць канкурэнтаздольнасць галіны. Акрамя таго, захоўваецца адмоўнае сальда ў гандлі з трэцімі краінамі. Па выніках мінулага года тавараабарот па харчовых таварах краін “пяцёркі” перавысіў $43 млрд, з якіх 61% ($26,5 млрд) прыпадае на імпарт.

Асаблівая ўвага на нарадзе была ўдзелена неабходнасці рэалізацыі сумесных міждзяржаўных праектаў і фарміраванню еўразійскіх цэнтраў кампетэнцыі. Гэта дасць магчымасць павысіць эфектыўнасць і выніковасць выкарыстання навуковага патэнцыялу дзяржаў — членаў ЕАЭС, рацыянальна расходаваць сродкі, выключыць дубліраванне навуковых даследаванняў і канструктарскіх распрацовак у аграпрамысловай сферы і нарошчваць кааперацыю ў навуковай і інавацыйнай дзейнасці. Была адзначана неабходнасць адаптацыі распрацовак да ўмоў функцыянавання ўсіх форм гаспадарання суб’ектаў АПК. На думку Сяргея Сідорскага, асабліва гэта актуальна для Арменіі, Казахстана і Кыргызстана, дзе асноўныя аб’ёмы вытворчасці сканцэнтраваны ў дробных і сярэдніх гаспадарках. “Мы не павінны арыентавацца на стварэнне ўмоў толькі для буйнога бізнесу”, — падкрэсліў міністр ЕЭК.

Пакінуць каментарый

Ваш электронны адрас не будзе апублікаваны. Абавязковыя палі пазначаны *