Звыш дванаццаці гадоў у гімназіі № 1 Горак практыкуюць аднастайнасць у адзенні навучэнцаў. Педагагічны калектыў перакананы: школьная форма прывучае дзяцей да парадку, дысцыпліны, згладжвае сацыяльную няроўнасць і падтрымлівае імідж установы адукацыі. Падрабязнасці – у матэрыяле карэспандэнта «Настаўніцкай газеты».
— Агульны адметны элемент у адзенні гімназістаў з’явіўся ў 2010 годзе. Ідэя ўзнікла на пасяджэнні бацькоўскага камітэта, навучэнцы яе падтрымалі. Так у гардэробе вучняў з’явіліся аднолькавыя шэрыя камізэлькі з нашыўкай-шаўронам, на якой была адлюстравана эмблема нашай навучальнай установы. Дарэчы, распрацавалі выяву непасрэдна самі дзеці, — паведаміў дырэктар Сяргей Пруднікаў.
Паводле яго слоў, увядзенне формы вырашыла многія надзённыя пытанні. Бацькі адразу пазбавіліся адвечнай праблемы: у што апрануць дзіця? Акрамя таго, форма дазволіла забяспечыць пэўную сацыяльную роўнасць. А яшчэ ўзмацніла дысцыпліну і адказнасць сярод навучэнцаў. Выразныя правілы ў адзенні дапамагаюць навучэнцам лягчэй настройвацца на вучобу.
Летась, калі адзіны элемент у адзенні школьнікаў уводзіўся па ўсёй краіне, у 1-й горацкай гімназіі таксама захацелі ўдасканаліць сваю форму. Але сутыкнуліся з праблемай.
— Думалі зноў закупіць для ўсіх навучэнцаў камізэлькі з касцюмнай тканіны, але многія швейныя прадпрыемствы такія не вырабляюць або прапануюць па занадта высокім кошце. З гэтай прычыны мы спынілі свой выбар на трыкатажных камізэльках, на якіх па-ранейшаму красуецца нашыўка з эмблемай гімназіі. Заказ аформілі на ААТ “Палессе”. Прадстаўнікі таварыства выехалі з поўнай лінейкай размернага рада да нас ва ўстанову. Бацькі разам з дзецьмі на месцы прымяралі камізэльку і афармлялі пакупку, — расказаў Сяргей Іванавіч.
У дадатак да трыкатажных камізэлек гімназісты зараз носяць штаны ці спадніцы цёмнага колеру. Таксама ў вучняў ёсць значкі з эмблемай установы. Новай формай поўнасцю задаволены і дзеці, і бацькі. Што нядзіўна: адзенне не толькі зручнае і камфортнае, але і стыльнае і прыгожае.
— Аднак самае галоўнае тое, што аднолькавая форма фарміруе ў вучняў пачуццё адзінства, прыналежнасці да нашай гімназіі. Навучэнцы носяць форму з задавальненнем і гордасцю, — адзначыў Сяргей Пруднікаў.
Ганна СІНЬКЕВІЧ
Фота прадастаўлена ўстановай адукацыі