Магчымасць выказаць любоў да Радзімы мовай музыкі і песень даў моладзі фестываль патрыятычнай песні “Чырвоны гваздзік”, які чарговы раз адбыўся на Магілёўшчыне.
Арганізатарамі музычнага фестывалю, накіраванага на грамадзянскае станаўленне і выхаванне падрастаючага пакалення, выступаюць абласное кадэцкае вучылішча і Магілёўскі інстытут МУС. Сёлета ўдзел у конкурсе прынялі прадстаўнікі кадэцкіх вучылішчаў і спецыялізаваных ліцэяў з усёй Беларусі, а таксама навучэнцы спецыялізаваных устаноў Тулы і Бранска (Расія).
Канкурсанты выступалі на сцэне з добра вядомымі ў народзе песнямі. Маладыя людзі пранікнёна і пачуццёва выконвалі кампазіцыі пра вайну, любоў да Радзімы, пра сапраўдных людзей, гатовых у цяжкую хвіліну прыйсці на дапамогу. Моладзь прысвячала свае выступленні загінуўшым героям, тым, хто выжыў на палях бітваў.
Гран-пры фестывалю сёлета дасталася прадстаўніцы юрыдычнага паліцэйскага каледжа Тулы Уладзе Зарыпавай. Узнагародамі адзначылі і шэраг лаўрэатаў. Астатнія канкурсанты атрымалі дыпломы ўдзельнікаў і памятныя падарункі.
Ганна СІНЬКЕВІЧ.
Фота аўтара.