Павышэнне зарплаты закране большасць бюджэтнікаў

Сярэдняя зарплата ў бюджэтнай сферы ў 2018 годзе складзе не менш як Br700, паведаміла міністр працы і сацыяльнай абароны Ірына Касцевіч.

“На 2018 год таксама прадугледжаны рост заработнай платы ў бюджэтнай сферы. Плануецца выйсці ў сярэднім пры кансерватыўным сцэнарыі на Br700. Калі, вядома, эканоміка забяспечыць адпаведны рост — а задача стаіць 103,5 працэнта (тэмп росту ВУП), — то, я думаю, Br760 у сярэднім у бюджэтнай сферы мы зможам забяспечыць”, — сказала Ірына Касцевіч.

Што тычыцца ўзроўню зарплаты ў снежні, у сярэднім яна павышана на 7 працэнтаў. Прычым павышэнне залежыць ад разраду кожнага работніка. У катэгорый работнікаў, якія тарыфікуюцца з 1-га па 9-ы разрад, у сярэднім зарплата паднімецца на 9—15 працэнтаў (або на Br26—Br35). У сферы культуры гэта тычыцца бібліятэкараў, экскурсаводаў, кіраўнікоў гурткоў, у сферы сацыяльных паслуг — нянек, сядзелак, сацыяльных работнікаў, у адукацыі ў рамках адпаведных разрадаў — памочнікаў выхавальнікаў, выхавальнікаў. З 9-га па 17-ы разрад павышэнне складзе да Br24. Гэта тычыцца настаўнікаў, урачоў, эканамістаў, юрыстаў.

Пры гэтым у большым памеры зарплата вырасце менавіта ў нізкааплатных катэгорый работнікаў, якія тарыфікуюцца з 1-га па 4-ы разрад.

Паводле слоў Ірыны Касцевіч, у цэлым павышэнне заработнай платы закране каля 88 працэнтаў занятых у бюджэтнай сферы. Гэта амаль 750 тысяч чалавек.

Пакінуць каментарый

Ваш электронны адрас не будзе апублікаваны. Абавязковыя палі пазначаны *