Роля Мінскага паўмарафону як пляцоўкі для рэалізацыі дабрачынных праектаў становіцца асабліва прыкметнай. Пра гэта заявіў старшыня Беларускай федэрацыі лёгкай атлетыкі Вадзім Дзевятоўскі.
Яркім момантам Мінскага паўмарафону, які пройдзе 9 верасня, стане дабрачынны забег. Арганізатары заклікаюць падтрымаць фандрайзінгавую кампанію, дзякуючы якой будуць сабраны сродкі на падтрымку чатырох праектаў у дапамогу дзецям — праз фінансавую падтрымку іх “бягучых прадстаўнікоў”. Сума, якую плануецца сабраць на кожны з праектаў, — Br20 тысяч. “Нядаўна мы заявілі пра фонд Аляксея Талая, але не застаемся ў баку ад іншых прапаноў дабрачынных арганізацый, якія хочуць на нашу пляцоўку прыцягнуць яшчэ людзей, неабыякавых да праблем і цяжкасцей іншых. Паасобку складаней, а разам, калі мы ўзнімаем нейкія пытанні, яны атрымліваюць большы рэзананс. Прыцягваюцца вядомыя людзі з актыўнай пазіцыяй. Мы рады, што пляцоўка паўмарафону з гэтага года становіцца актыўнай пляцоўкай для дабрачыннасці”, — сказаў Вадзім Дзевятоўскі.
Ён выказаў упэўненасць, што ўдзел вядомых асоб, спартсменаў, іх асабісты прыклад прыцягне шмат людзей. Пераадольваючы сябе на дыстанцыі, бегуны-пачаткоўцы будуць прысвячаць свае маленькія перамогі над сабой тым, хто мае патрэбу ў дапамозе.
Ідэя дабрачыннага марафону нарадзілася ў сацыяльна-дабрачыннай спартыўнай установе “Каманда “Крылы анёлаў”. Яе ўдзельнікі, а гэта пераважна бацькі дзяцей з інваліднасцю, спартсмены — усяго каля 70 чалавек, прымуць удзел у забегу. Як расказаў дырэктар каманды “Крылы анёлаў” Дзмітрый Цімашкоў, упершыню ў гісторыі Беларусі на дыстанцыю выйдуць некалькі хлопчыкаў і дзяўчынак з дома-інтэрната для дзяцей з псіхафізічнымі парушэннямі ў Навінках. Уласна, у гэтым сутнасць праекта “У соцыум — бягом”, на які “Крылы анёлаў” збіраюць сродкі. Ён арыентаваны на дзяцей з інтэрнатаў. На сабраныя грошы будуць набыты дзве спецыяльныя каляскі вялікага памеру для ўдзелу ў марафонах падлеткаў і нават дарослых жыхароў дамоў-інтэрнатаў, забяспечана іх транспарціроўка да месцаў спаборніцтваў, тэхнічнае абслугоўванне і захоўванне на працягу года, каб такія людзі больш актыўна ўключаліся ў жыццё грамадства.
Дырэктар фонду “Шанс” Наталля Маханько расказала пра праект “Адшукваецца ген”. Фонд збірае сродкі на аплату дарагога генетычнага аналізу дзецям з цяжкімі формамі неўралагічных захворванняў, якія стаяць на ўліку ў РНПЦ неўралогіі і нейрахірургіі. Ён дае магчымасць паставіць дакладны дыягназ, прадказаць далейшае развіццё захворвання, скарэкціраваць лячэнне і вызначыць рызыку спадчыннага захворвання для нашчадкаў.
Праект Беларускага дзіцячага хоспіса “ДОБРАўпарадкуем” прызначаны дапамагчы летняму цэнтру “Бусел” у Стаўбцоўскім раёне — набыць і ўстанавіць адаптыўную гульнявую пляцоўку.
Генеральны дырэктар міжнароднай грамадскай арганізацыі “SOS-Дзіцячая вёска” Таццяна Бурава адзначыла, што гэта першы вопыт супрацоўніцтва арганізацыі са спартыўнымі ініцыятывамі. “Для нас сабраная сума стане сур’ёзнай падмогай: як мінімум 10 дзяцей змогуць знайсці новую сям’ю і адчуюць, што яны любімыя, патрэбныя і пад абаронай. Грошы будуць накіраваны на тое, каб аказаць дзецям і іх сем’ям неабходную псіхалагічную падтрымку, зрабіць SOS-Дзіцячую вёску лепшым месцам для іх”, — растлумачыла яна.
Міністэрства аховы здароўя даўно падтрымлівае розныя дабрачынныя акцыі, супрацоўнічаючы з фондамі, рознымі грамадскімі арганізацыямі. Начальнік аддзела медыцынскай дапамогі маці і дзецям галоўнага ўпраўлення арганізацыі медыцынскай дапамогі і экспертызы Міністэрства аховы здароўя Людміла Лёгкая звярнула ўвагу на важнасць такога ўзаемадзеяння, паколькі яно дапамагае сумесна вырашаць праблемы. “У канцы 1990 — пачатку 2000 гадоў узаемадзеянне з Беларускім дзіцячым фондам дало магчымасць развівацца дзіцячай кардыяхірургіі. І цяпер у нас ёсць цэнтр, дзеці з праблемамі аперыруюцца. Ва ўзаемадзеянні з дабрачынным фондам “Шанс” цяпер развіваем галіну ў дзіцячай кардыялогіі — рытмалогію”, — расказала Людміла Лёгкая.
