Школа будзе паспяховай толькі ў тым выпадку, калі ёй кіруе чалавек, які належыць да ліку тых майстроў сваёй справы, якія сумяшчаюць у сабе багаты выкладчыцкі вопыт, вялікі аб’ём ведаў і па-сапраўднаму творчае, душэўнае стаўленне да ўсяго калектыву.

Інтэлігентнасць, мяккасць, адсутнасць аўтарытарных метадаў у рабоце з калегамі, вучнямі і іх бацькамі, і пры гэтым кампетэнт­насць, прагрэсіўнасць, індывідуальны падыход да кожнага адрознівае дырэктара сярэдняй школы № 3 Слоніма Ірыну Міхайлаўну Клябанаву.

Са школьных гадоў Ірына марыла аб педагагічнай адукацыі, і яна ажыццявіла сваю задуму, скончыўшы філалагічны факультэт Гродзенскага дзяржаўнага ўніверсітэта імя Янкі Купалы.

Па размеркаванні малады спецыяліст была накіравана ў Свіслацкі раён Гродзенскай вобласці. Першым месцам працы для яе стала Драчанская вясковая школа, дзе дзяўчына адточвала майстэрства настаўніка беларускай мовы і літаратуры. Давялося Ірыне Міхайлаўне папрацаваць і з дзецьмі, якія выхоўваліся ў Свіслацкай школе-інтэрнаце.

Праз некаторы час І.М.Клябанава вярнулася ў Слонім, дзе адбыўся далейшы прафесійны рост педагога. Яна выкладала беларускую мову і літаратуру ў 3-й школе. Потым арганізатарскія якасці, прафесіяналізм маладога настаўніка адзначылі ў аддзеле адукацыі, і на працягу дзесяці гадоў Ірына Міхайлаўна працавала на пасадзе намесніка дырэктара па вучэбнай рабоце 1-й школы (пазней — Слонімскага дзяржаўнага агульнаадукацыйнага ліцэя).

Апошнія восем гадоў І.М.Клябанава з’яўляецца дырэктарам 3-й школы. Для кіраўніка вельмі важна стварыць эфектыўную педагагічную каманду, члены якой валодалі б ініцыятыўнасцю, адказнасцю, высокай працаздольнасцю, а таксама тэхналогіямі каманднай работы для распрацоўкі, а затым для рэалізацыі разнастайных праектаў і ідэй. Ірына Міхайлаўна ў сваёй дзейнасці паспяхова кіруецца педагагічным крэда: “Сабрацца разам ёсць пачатак, захавацца разам ёсць прагрэс, працаваць разам ёсць поспех”. І для гэтага існуе падстава. Педагогі школы Т.Г.Славінская, Т.А. Шаўчэнка былі фіналістамі і прызёрамі раённага конкурсу “Настаўнік года”, фіналістам абласнога этапу стала І.А.Чарапенька. Намеснікі дырэктара С.М.Панчанка, Н.А.Барысік станавіліся прызёрамі конкурсу “Камп’ютар. Адукацыя. Інтэрнэт”. Пад кіраўніцт­вам І.М.Клябанавай школа прызнана лепшай па выніках раённага конкурсу на лепшую арганізацыю работы ўстаноў агульнай сярэдняй адукацыі ў 2015 го­дзе, другой — па выніках 2016 года. Апошнія гады 3-я школа займае лідзіруючую пазіцыю ў алімпіядным руху, даследчай дзейнасці. Тры гады Ірына Міхайлаўна з’яўлялася кіраўніком рэспубліканскага інавацыйнага праекта  “Укараненне мадэлі фарміравання медыякультуры вучняў ва ўмовах інфармацыйна-камунікацыйнага асяроддзя ўстаноў адукацыі”.

І.М.Клябанава лічыць, што ўсё роўна, якую аду­кацыю мае дырэктар школы, але педагагічны вопыт у яго павінен быць: “Любы дырэктар школы павінен “па­стаяць ля станка”, ля дошкі ў класе — мець вопыт выкладання”.

Безумоўна, дырэктар школы стаіць на чале складанага механізма. З аднаго боку, неабходна ісці на кампрамісы, а з другога — заставацца непарушным прыкладам кіраўніка. Выдатныя арганізатарскія здольнасці, веданне псіхалогіі дапамагаюць Ірыне Міхайлаўне захапіць педагагічны калектыў вялікай агульнай справай. Як дырэктар яна не баіцца ўкараняць новае ў вучэбна-выхаваўчы працэс, пры гэтым Ірына Міхайлаўна імкнецца, каб лепшыя традыцыі школы захоўваліся.

— Для таго каб школа была паспяховай, неабходна, каб яе кіраўнік вырашаў галоўную задачу — забяспечваў апераджальны характар адукацыі: ставіў задачы, важныя сёння, якія стануць яшчэ больш важнымі заўтра, а галоўнае — умеў знаходзіць шляхі іх вырашэння, — упэўнена Ірына Клябанава.

Таццяна БАБАРЫКА.