Поспехі канькабежцаў, спартыўная інжынерыя і запатрабаванасць аб’ектаў

У БНТУ абмеркавалі будучыню студэнцкага спорту

Днямі на базе Беларускага нацыянальнага тэхнічнага ўніверсітэта адбылося ўшаноўванне ўдзельнікаў IV чэмпіянату свету сярод студэнтаў па канькабежным спорце. Нагадаем нашым чытачам, што беларускія канькабежцы заваявалі 4 медалі міжнароднага студэнцкага спартыўнага форуму.

У мерапрыемстве ўзялі ўдзел міністр адукацыі Ігар Карпенка, віцэ-прэзідэнт Нацыянальнага алімпійскага камітэта рэктар Беларускага дзяржаўнага ўніверсітэта фізічнай культуры Сяргей Рэпкін, старшыня Беларускай асацыяцыі студэнцкага спорту Аляксандр Багдановіч, рэктар Беларускага нацыянальнага тэхнічнага ўніверсітэта Сяргей Харытончык, рэктар Магілёўскага дзяржаўнага ўніверсітэта імя А.А.Куляшова Дзяніс Дук, рэктар Акадэміі кіравання пры Прэзідэнце Рэспублікі Беларусь Марат Жылінскі і прарэктар Беларускага дзяржаўнага аграрна-тэхнічнага ўніверсітэта Уладзімір Пазнякоў.

“Для Беларусі гэта новае пачынанне, — адзначыў падчас сустрэчы міністр адукацыі Ігар Карпенка. — Усяго толькі другі чэмпіянат такога ўзроўню і першы па канькабежным спорце. У 2020 годзе Беларусь прыме аналагічны турнір па веславанні на байдарках і каноэ.

Зразумела, падрыхтоўка выклікала хваляванне. Мы былі засяроджаны на тым, ці атрымаецца ў нас граматна пабудаваць лагістыку і самі спаборніцтвы, наколькі мы зможам быць гасціннымі. Пасля завяршэння турніру ў адрас Міністэрства адукацыі і іншых арганізатараў дасланы падзякі. Значыць, кожны з нас якасна спрацаваў на сваім узроўні.

Чэмпіянат свету — гэта выдатная магчымасць для маладых спартсменаў паспрабаваць свае сілы, адчуць уласны ўзровень сярод прадстаўнікоў іншых краін. Вынікі выступлення (1 залаты, 2 сярэбраныя і 1 бронзавы медалі) не могуць не радаваць. Нехта паказаў не той вынік, які хацеў, але гэта таксама каштоўны вопыт”.

Міністр адукацыі падкрэсліў, што месцам сустрэчы невыпадкова стаў Беларускі нацыянальны тэхнічны ўніверсітэт. Менавіта тут актыўна развіваецца спартыўная інжынерыя. І беларускія канькабежцы адны з першых, хто скарыстаўся магчымасцю задзейнічаць новыя тэхналогіі ў падрыхтоўцы.

“Мы задумваемся над тым, каб установы вышэйшай адукацыі інжынерна-тэхнічнага профілю ўзаемадзейнічалі з установамі, якія развіваюць фізічную культуру і спорт, — паведаміў Ігар Карпенка. — У рамках гэтага кластара могуць быць вырашаны маштабныя задачы”.

Міністр адукацыі выказаў падзяку ўсім ведамствам, якія прымалі ўдзел у падрыхтоўцы чэмпіянату, і падкрэсліў, што дзяржаве важна, каб спартыўныя аб’екты краіны былі запатрабаваны не толькі нашымі спартсменамі, але і служылі базай для падрыхтоўкі каманд іншых краін.

Студэнты-спартсмены атрымалі магчымасць прамога дыялогу з рэктарамі тых устаноў вышэйшай адукацыі, у якіх яны вучацца, а таксама атрымалі ад аргкамітэта чэмпіянату і кіраўнікоў alma mater падзякі і падарункі.

Наталля АЛЁХІНА.
Фота Алега ІГНАТОВІЧА.