Маладыя вадзіцелі перавезлі больш за 472 тысячы тон збожжа, паведаміў афіцыйны прадстаўнік Цэнтральнага камітэта БРСМ кіраўнік праекта “Моладзь за ўраджай!” Уладзіслаў Дубіцкі.
“Маладзёжныя экіпажы падчас уборачнай кампаніі намалацілі 687 280 т збожжа, а маладыя вадзіцелі перавезлі 472 295 т”, — расказаў Уладзіслаў Дубіцкі.
Паводле яго слоў, усяго ва ўборачнай кампаніі было задзейнічана 819 маладзёжных экіпажаў. З іх вызначыліся 224 тысячнікі, 13 двухтысячнікаў, два трохтысячнікі, — адзначыў афіцыйны прадстаўнік ЦК БРСМ. — Акрамя таго, на ўборцы працавалі 586 маладых вадзіцеляў. З іх 186 перавезлі па 1 тысячы т і больш намалочанага збожжа, 40 — больш як па 2 тысячы т, 10 — больш як па 3 тысячы т, 2 — больш як па 4 тысячы т збожжа”.
На палях у кожным рэгіёне падчас уборачнай кампаніі ўшаноўвалі маладых лідараў, уручалі ім дыпломы і вымпелы. Тэрытарыяльныя арганізацыі БРСМ таксама накіроўвалі бацькам маладых людзей падзячныя пісьмы.
Рэспубліканскі праект “Моладзь за ўраджай!” стартаваў 12 ліпеня. Гэта своеасаблівыя спаборніцтвы паміж маладымі камбайнерамі і вадзіцелямі, занятымі на ўборцы збожжа і зернебабовых культур. Традыцыйна праект уключае дзве намінацыі — “Маладзёжны экіпаж камбайнераў, які дасягнуў найбольшага намалоту” і “Маладзёжны экіпаж, які перавёз найвышэйшую колькасць збожжа”. Прадугледжана комплексная інфармацыйная кампанія на афіцыйных інтэрнэт-рэсурсах БРСМ, у групах маладзёжнай арганізацыі і сацыяльных сетках пад хэштэгамі #молодежьзаурожай, #жатвабеларуси2021 і #роднаенароднае.
Маладзёжны праект рэалізуецца БРСМ пры падтрымцы Міністэрства сельскай гаспадаркі і харчавання і іншых зацікаўленых. Ён садзейнічае павышэнню нацыянальнай харчовай бяспекі, папулярызацыі сельскагаспадарчай працы і прафесій аграрнага профілю, замацаванню моладзі ў вёсцы.