Працаваць на развіццё

Выніковая калегія галоўнага ўпраўлення па адукацыі Віцебскага аблвыканкама адбылася на базе абласнога Палаца дзяцей і моладзі

У калегіі прынялі ўдзел першы намеснік міністра адукацыі Рэспублікі Беларусь Ірына Старавойтава, старшыня Віцебскага абласнога Савета дэпутатаў Уладзімір Цярэнцьеў, дэпутаты Нацыянальнага сходу Рэспублікі Беларусь, кіраўнікі абласных і раённых органаў дзяржаўнага кіравання, аддзелаў і ўпраўленняў па адукацыі рай(гар)выканкамаў, устаноў адукацыі рэгіёна.

Прадстаўнікоў раёна — дырэктара Альгоўскага ясляў-сада — базавай школы Святлану Ільюшчанка (узнагароджана Ганаровай граматай Віцебскага абласнога Савета дэпутатаў) і настаўніка гэтай жа школы Гена­дзя Варапаева (узнагароджаны нагрудным знакам Міністэрства адукацыі Рэспублікі Беларусь “Выдатнік адукацыі”) — павіншавалі загад­чык вучэбна-метадычнага кабінета Ірына Чумакова (на фота справа) і начальнік аддзела па адукацыі Віцебскага райвыканкама Вольга Разанава.

Аб выніках работы за 2018 год і задачах на 2019 год расказаў начальнік галоўнага ўпраўлення па адукацыі Дзмітрый Хома. Ён праінфармаваў аб хо­дзе выканання задач, пастаўленых перад сістэмай адукацыі Віцебскім аблвыканкамам. Сярод іх — мабілізацыя дзейнасці сістэмы ў цэлым і кожнай установы адукацыі асобна на дасягненне канкрэтнага выніку, арганізацыя ўмоў для ўсебаковага развіцця асобы дзіцяці і навучэнца, аптымізацыя выдаткаў і аператыўнае паляпшэнне матэрыяльна-тэхнічнай базы і г.д. Над задачамі сістэма адукацыі працуе пры моцнай падтрымцы кіраўніцтва рэгіёна. Больш за дваццаць знакавых для адукацыі рэгіёна мерапрыемстваў у 2018 годзе прайшлі з асабістым удзелам старшынь аблвыканкама Мікалая Шарстнёва і абласнога Савета дэпутатаў Уладзіміра Цярэнцьева, у многіх прынялі ўдзел старшыні раённых і гарадскіх выканаўчых камітэтаў. Пытанне забеспячэння якасці адукацыі, развіцця матэрыяльна-тэхнічнай базы ўстаноў адукацыі разгледжаны ў мінулым сакавіку на сесіі абласнога Савета дэпутатаў. Усё гэта ўказвае на асаблівую ўвагу і давер органаў улады да работы сістэмы адукацыі.

Як падкрэсліў Дзмітрый Хома, ключавой постаццю ў вырашэнні пастаўленых задач з’яўляецца педагог, здольны адказваць выклікам часу, эфектыўна працаваць у сучасных умовах, самаразвівацца і ясна разумець стратэгію развіцця сістэмы адукацыі, вырашаць дзяржаўныя задачы па навучанні і адукацыі дзяцей. Вобласць забяспечана ў дастатковай колькасці кваліфікаванымі кадрамі. Склалася сістэма маральнага і матэрыяльнага стымулявання вынікаў педагагічнай працы, павышэння кваліфікацыі, работы ў міжкурсавы перыяд. Безумоўна, эфектыўная работа педагога і павышэнне матывацыі навучэнцаў да вучобы патрабуюць пастаяннага ўдасканалення матэрыяльна-тэхнічнай базы, набыцця сучаснай тэхнікі і абсталявання. У 2016—2018 гадах была праведзена сур’ёзная работа ў гэтым напрамку, у тым ліку па набыцці сродкаў навучання, сучаснага вучэбнага абсталявання, спартыўнага інвентару, навучэнскай мэблі.

У мінулым годзе ўведзены ў эксплуатацыю яслі-сад № 113 на 200 месцаў у віцебскім мікрараёне Білева-2, за кошт крэдытных рэсурсаў працягваецца будаўніцтва агульнаадукацыйнай школы на 1020 месцаў у Віцебску, выкананы капітальны рамонт і мадэрнізацыя абласнога Палаца дзяцей і моладзі, з бюджэтных сродкаў набыты 22 аўтобусы і 6 мікрааўтобусаў для арганізацыі падвозу навучэнцаў і выхаванцаў, 7 ізатэрм для падвозу прадуктаў. Істотна адноўлена камп’ютарная тэхніка, школьная мэбля, тэхналагічнае, халадзільнае і іншае абсталяванне ва ўстановах адукацыі, звыш 550 тысяч рублёў выдаткавана на набыццё спартыўнага інвентару.

Ірына Старавойтава уручыла Ганаровую грамату Міністэрства адукацыі Рэспублікі Беларусь намесніку дырэк­тара па вучэбна-вытворчай рабоце Аршан­скага дзяржаўнага прафесійнага ліцэя тэкстыльшчыкаў імя Г.В.Сямёнава Святлане Рыжыкавай.

Начальнік галоўнага ўпраўлення па адукацыі выказаў асобную падзяку старшыням Сенненскага, Дубровенскага, Віцебскага, Полацкага, Гарадоцкага, Бешанковіцкага райвыканкамаў, дзе сістэма адукацыі ў мінулым годзе атрымала больш грашовых сродкаў, чым было прадугледжана абласным бюджэтам. Дзмітрый Леанідавіч указаў на неабходнасць у бягучым годзе працягнуць работу па эканоміі бюджэтных сродкаў, павышэнні эканамічнай эфектыўнасці дзейнасці ўстаноў адукацыі, развіцці пазабюджэтнай дзейнасці, а затым прывёў кароткі аналіз рашэння пастаўленых задач па ўзроўнях адукацыі. Характэрна, што па пераважнай большасці паказчыкаў назіраецца выразная станоўчая дынаміка. Напрыклад, у сістэме дашкольнай адукацыі выкананы асноўныя паказчыкі якасці адукацыі, на працягу шэрага гадоў паказчык дзіцячай захваральнасці ніжэйшы за рэспубліканскі. Чарга для накіравання дзяцей ва ўстановы адсутнічае, нарматыў забяспечанасці дашкольнымі месцамі выконваецца з перавышэннем. Рай(гар)выканкамамі заяўлена патрэбнасць у будаўніцтве 9 устаноў дашкольнай адукацыі ў мікрараёнах-новабудоўлях. Сярод пастаўленых на сёлета задач — павышэнне адукацыйнага ўзроўню педагогаў, у прыватнасці, праз атрыманне вышэйшай адукацыі па профілі “педагогіка дзяцінства”, хаця варта заўважыць, што і ў гэтым напрамку за мінулы год зроблены вялікі рывок. У сістэме агульнай сярэдняй адукацыі выкананы задачы па павышэнні якасных паказчыкаў, палепшыліся вынікі цэнтралізаванага тэсціравання, Рэспубліканскага конкурсу работ навучэнцаў даследчага характару (вобласць выйшла з 4-га на 2-е месца ў рэспубліцы), заключнага этапу рэспубліканскай алімпіяды па вучэбных прадметах (на 14 дыпломаў больш, чым у 2017 го­дзе), заваявана 5 медалёў на міжнародных алімпіядах (у 2017 годзе было 3). Стабільнымі застаюцца паказчыкі якасці адукацыі па выніках выпускных экзаменаў, пры гэтым 42 працэнты выпускнікоў базавай і 37 працэнтаў сярэдняй школы працягнулі навучанне ва ўстановах прафесійнай адукацыі. Рэалізуюцца меры сацыяльнай падтрымкі навучэнцаў, абласным Саветам дэпутатаў прынята рашэнне аб бясплатным праездзе школьнікаў, 62 працэнты навучэнцаў атрымліва­юць гарачае харчаванне за кошт сродкаў абласнога бюджэту. З абласнога бюджэту 60,5 тысячы рублёў накіравана на матэрыяльнае стымуляванне адораных дзяцей і педагогаў, 250 тысяч рублёў — на развіццё матэрыяльна-тэхнічнай базы ўстаноў, навучэнцы якіх прадэманстравалі высокія вынікі. У вобласці актыўна развіваюцца ІТ-тэхналогіі, робататэхніка і праграмаванне, дапрофільная падрыхтоўка і профільнае навучанне. У бягучым навучальным годзе профільныя класы адкрыты ў 213 установах агульнай сярэдняй адукацыі, на павышаным узроўні прадмет вывучаюць 65,5 працэнта навучэнцаў — самы высокі вынік у вобласці за апошнія 5 гадоў. Прафесійная падрыхтоўка ў рамках вучэбнага прадмета “Працоўнае навучанне” па 21 прафесіі арганізавана ў 170 установах агульнай сярэдняй адукацыі і 10 установах ПТА і ССА, у 30 установах адкрыты класы аграрнай накіраванасці. Падзейным і выніковым быў мінулы год і па такіх напрамках, як прафесійная і спецыяльная адукацыя, ахова дзяцінства, выхаваўчая і ідэалагічная работа, працаўладкаванне выпускнікоў.

— Сістэма адукацыі вобласці павінна працаваць на развіццё, — звярнуўся да ўдзельнікаў калегіі Дзмітрый Хома. — Таму патрабую ад кожнага з вас пастаяннага аналізу сітуацыі і ацэнкі дынамікі па ўсіх напрамках дзейнасці і па кожным паказчыку, дэталёвай прапрацоўкі і прыняцця аптымальных рашэнняў, накіраваных на захаванне і памнажэнне атрыманых вынікаў. Мы павінны разумець, што кожны пражыты год — гэта год будаўніцтва будучыні на карысць нашых выхаванцаў, навучэнцаў, студэнтаў.

Вопытам работы па сваіх напрамках падзяліліся з удзельнікамі калегіі прадстаўнікі раённых органаў улады, органаў кіравання адукацыяй, дырэктары ўстаноў адукацыі, педагогі. Лепшым з лепшых былі ўрачыста ўручаны заслужаныя ўзнагароды.

Знамянальным для адукацыі краіны назвала мінулы год Ірына Старавойтава. Яна акцэнтавала ўвагу, што ў мінулым го­дзе развіццё сістэмы адукацыі было накіравана на выкананне даручэнняў кіраўніка дзяржавы і ўрада ў адпаведнасці з прынятымі канцэптуальнымі падыходамі. Сёння бачны пэўныя вынікі: у дашкольнай адукацыі паслядоўна вырашаюцца пытанні забяспечанасці, даступнасці, бяспекі дзяцей; у агульнай сярэдняй адукацыі працягнута работа па паэтапным аднаўленні вучэбных праграм; для навучэнцаў 10 класа, якія вывучаюць усе вучэбныя прадметы на базавым узроўні, з 1 верасня арганізавана прафесійная падрыхтоўка ў рамках вучэбнага прадмета “Працоўнае навучанне”. Ёсць і шэраг нявырашаных пытанняў.

— Прафесійна-тэхнічная і сярэдняя спецыяльная адукацыя арыентаваны на дасягненне максімальнай узгодненасці з рынкам адукацыйных паслуг, — адзначыла Ірына Анатольеўна. — Мы адкрыты да ўзаемадзеяння з рэальным сектарам эканомікі, і ў гэтым сэнсе адкрытасць павінна быць рэалізавана ў кожнай установе адукацыі. Трэба выбудоўваць з наймальнікамі планавую сістэмную работу па максімальна эфектыўным узаемадзеянні на ўсіх узроўнях — пачынаючы ад фарміравання заказу на падрыхтоўку кадраў, зместу вучэбных праграм і прафесійных стандартаў да арганізацыі і правядзення практык, кваліфікацыйных экзаменаў, удзелу ва ўмацаванні матэрыяльна-тэхнічнай базы ўстаноў адукацыі, сафінансаванні прафесійнай падрыхтоўкі. У ліку актуальных задач на найбліжэйшую перспектыву — аптымізацыя і ўдасканальванне магістарскай падрыхтоўкі, яе пераарыентацыя на патрэбнасці адукацыі і навукова-інавацыйнай сферы. Неабходна звярнуць большую ўвагу на пытанні кваліфікацыі кадраў у адукацыі і выхаваўчую работу, арганізаваць сістэмны маніторынг эфектыўнасці дзейнасці ўстаноў па правя­дзенні комплекснай рэабілітацыі непаўналетніх, ужыванне якімі наркатычных сродкаў, псіхатропаў або іх аналагаў, таксічных або іншых адурманьваючых рэчываў, алкагольных напіткаў устаноўлена ў адпаведнасці з заканадаўствам. Асаблівай увагі патрабуе і работа з сем’ямі такіх непаўналетніх. Задачы перад сістэмай адукацыі штогод ставяцца вельмі вялікія, значныя. Калі мы — усе разам і кожны асабіста — адказна і з поўнай аддачай сіл будзем працаваць, то атрымаем дастойны вынік, я ў гэтым упэўнена.

Таццяна БОНДАРАВА.
Фота аўтара.