Апошнія школьныя шары запушчаны і апошнія школьныя вальсы станцаваны. У мінулыя выхадныя 55,4 тысячы адзінаццацікласнікаў развіталіся са сваімі адукацыйнымі ўстановамі. У краіне прайшлі выпускныя вечары.
У сярэдняй школе Іўя Гродзенскай вобласці сёлета выпусцілі 52 чалавекі, 10 з іх атрымалі медалі. Перад пачаткам выпускнога балю ў фае школы збіраліся прыгожыя выпускнікі, іх бацькі, настаўнікі. Пакуль госці займалі месцы ў актавай зале, дырэктар школы Ганна Казіміраўна Чарняк заўважыла: “Кожны год ладзім такое свята, але ўсё роўна хвалюемся. Паглядзіце на нашых статных дзяўчат і важных хлопцаў. Выдатныя дзеці!”.
А ад выпускнікоў сапраўды не адарваць вачэй. Дарослыя, з сур’ёзнымі планамі на жыццё. А як жа інакш! “Калі хочаш дабіцца нечага ў жыцці, трэба шмат працаваць, — перакананы яны. — Мы сёння развітваемся са сваёй любімай школай, з роднымі настаўнікамі, якія нас вучылі і падтрымлівалі ўсе 11 гадоў. Шкада, канечне, але трэба рухацца наперад, бо там столькі цікавага!”
Цікавае дарослае жыццё поўнае сюрпрызаў, прычым як радасных, так і не вельмі, але засмучацца не варта, бо жыццё ўсё расставіць па сваіх месцах. Як у сваім віншавальным слове адзначыў дырэктар дэпартамента кантролю якасці адукацыі Міністэрства адукацыі Міхаіл Уладзіміравіч Мірончык, у любой сітуацыі трэба найперш заставацца чалавекам.
“Першы сур’ёзны рубеж у жыцці кожнага з нас — заканчэнне школы. Выдатна, што сярод вас ёсць нямала тых, хто атрымае атэстат асаблівага ўзору. Вашы медалі — сведчанне якаснай адукацыі ў вашай школе. Усім выпускнікам жадаю быць настойлівымі і ўпартымі, дабівацца самых вялікіх мэт. І самае галоўнае, каб вы сталі дастойнымі людзьмі для сваёй краіны, для сваёй сям’і, для сваёй малой радзімы. Ніколі не забывайце тых, хто даў вам вялікія магчымасці, — педагогаў і бацькоў.
Звяртаючыся да бацькоў, хацелася б падзякаваць ім за тое, што на працягу 11 школьных гадоў былі побач са сваімі дзецьмі і разам з настаўнікамі ў сістэме адукацыі. Калі няма ўзаемаразумення паміж школай і сям’ёй, то дасягнуць высокіх адукацыйных вынікаў немагчыма.
Асаблівыя словы падзякі сёння, безумоўна, адрасуюцца педагогам, без якіх вы не сталі б такімі дарослымі і разумнымі”, — звярнуўся да прысутных Міхаіл Уладзіміравіч.
У Іўеўскай сярэдняй школе працуюць выдатныя настаўнікі, якія сёлетнім выпускнікам дапамаглі дабіцца шматлікіх перамог як на інтэлектуальных спаборніцтвах, так і ў спорце. Традыцыйна вучні Іўеўскай школы становяцца пераможцамі розных этапаў (у тым ліку рэспубліканскага) алімпіяды па інфарматыцы. Як заўважыла дырэктар, 57% педагогаў — былыя выпускнікі школы, што спрыяе пераемнасці традыцый.
Тры гады школа была ўдзельніцай эксперыментальнага праекта па апрабацыі дапрофільнай падрыхтоўкі на ІІ ступені агульнай сярэдняй адукацыі. Эксперымент перарос у інавацыйны праект “Апрабацыя мадэлі дапрофільнай педагагічнай падрыхтоўкі навучэнцаў на ІІ ступені агульнай сярэдняй адукацыі”, які быў разлічаны на 2016—2019 гады. Праведзеная работа дала чаканыя вынікі: удалося стварыць умовы для фарміравання ў навучэнцаў цікавасці да педагагічнай дзейнасці і стымуляваць іх пазнавальную актыўнасць у працэсе дапрофільнай педагагічнай падрыхтоўкі, выбар імі навучання ў профільных педагагічных групах стаў больш асэнсаваным.
І вось падчас выпускнога вечара на сцэну былі запрошаны 9 дзяўчат, якія вучыліся ў профільнай педагагічнай групе. Будучых настаўніц павіншавала дырэктар школы Ганна Казіміраўна Чарняк і ўручыла ім віншавальныя паштоўкі ад Гродзенскага дзяржаўнага ўніверсітэта імя Янкі Купалы. Увогуле ў Іўеўскай школе са старшакласнікамі працуюць у адпаведнасці з іх запытамі, таму на павышаным узроўні тут вывучалі хімію—біялогію, фізіку—матэматыку, англійскую—рускую мову, рускую мову—гісторыю.
Многія выпускнікі падчас выпускнога вечара былі адзначаны пахвальнымі лістамі за вывучэнне асобных прадметаў. Многія атрымалі ўзнагароды ў намінацыях “Лепшы вучань”, “Лепшая вучаніца”, “Лідар выпуску”, “Эрудыт”, “За волю да перамогі”. Змагацца за перамогу выпускнікам Іўеўскай школы давядзецца яшчэ не раз. Прынамсі, сёння ў краіне стартуе ЦТ. Пасля яны стануць студэнтамі. Згодна з маім апытаннем, вучыцца плануюць у вышэйшых навучальных установах Мінска і Гродна. А там, праз крок — дарослае жыццё. Шчаслівага шляху!
Вольга ДУБОЎСКАЯ.
Фота аўтара.