Прэзідэнцкія стыпендыі — лепшым

Кіраўнік дзяржавы Аляксандр Лукашэнка падпісаў распараджэнне, якім зацверджана рашэнне савета спецыяльнага фонду Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў. Аб гэтым паведамілі ў прэс-службе беларускага лідара.

Згодна з рашэннем, для 191 студэнта ўстаноў вышэйшай адукацыі за высокія вынікі ў вучобе і навуковай дзейнасці назначаны стыпендыі Прэзідэнта Беларусі на другі семестр 2018/2019 навучальнага года. Грашовымі прэміямі заахвочаны таксама 117 навучэнцаў, якія перамаглі на міжнародных і рэспубліканскіх алімпіядах і інтэлектуальных конкурсах.

Па распараджэнні кіраўніка дзяржавы на фінансаванне ў гэтым годзе расходаў спецыяльнага фонду па сацыяльнай падтрымцы адораных навучэнцаў і студэнтаў выдзеляць амаль Br990 тысяч з рэзервовага фонду Прэзідэнта Рэспублікі Бе­ларусь.

Прыняцце дакумента накіравана на забеспячэнне адраснай дзяржаўнай падтрымкі адораных навучэнцаў і студэнтаў, стварэнне спрыяльных умоў для іх развіцця.