Пытанні далейшай работы нафтавага і нафтахімічнага комплексаў разгледжаны на нарадзе ў кіраўніка дзяржавы

Беларусь будзе імкнуцца пастаўляць з расійскага рынку 30—40 працэнтаў ад неабходных аб’ёмаў нафты. Пра гэта Прэзідэнт Беларусі Аляксандр Лукашэнка заявіў на нарадзе па пытаннях павышэння эфектыўнасці рэалізацыі нафтапрадуктаў на экспарт.

“Сапраўды, цяпер у поўным аб’ёме альтэрнатывы няма пастаўкам расійскай нафты. Але, як мы дамаўляліся, дыверсіфікавацца нам трэба. Трэба ісці да таго, што 30—40 працэнтаў нафты мы будзем купляць у Расійскай Федэрацыі. Працэнтаў 30 мы павінны завозіць з Балтыкі і працэнтаў 30 — праз Украіну — гэта правераны ўжо шлях. Магчыма, Казахстан зможа паставіць нам нафту, калі Расія згодзіцца з гэтым. Дзіўна: наш саюзнік не дае згоды на пастаўку нафты ад нашага іншага саюзніка. Што ж, такая сітуацыя цяпер па пастаўках нафты, і мы павінны ў гэтым разабрацца”, — заявіў кіраўнік дзяржавы.

Аляксандр Лукашэнка адзначыў, што на нарадзе ў вузкім коле спецыялістаў неабходна разгледзець пытанне аб далейшай рабоце нафтавага і нафтахімічнага комплексаў. “У дадзеным выпадку пытанне чарговы раз аб пастаўках нафты ў Беларусь, у тым ліку з сусветных рынкаў, не толькі з Расійскай Федэрацыі, што мы ўжо і пачалі рабіць”, — адзначыў беларускі лідар.

“Мы павінны на практыцы паглядзець, у што гэта выльецца. Браты з Усходу палохаюць, што гэта будзе вельмі дорага. Мы таксама, не палічыўшы, не паспрабаваўшы, думаем, што мы не справімся. Таму прынята рашэнне закупіць — азербайджанская гэта будзе, саудаўская, нарвежская ці амерыканская, няважна, якая нафта, — па сусветных цэнах. Паставіць на нашы нафтаперапрацоўчыя заводы і атрымаць нафтапрадукты з гэтай нафты. Гэта значыць, з альтэрнатыўных крыніц, вядома, не выключаючы галоўнага нашага пастаўшчыка — Расійскую Федэрацыю”, — сказаў прэзідэнт.

Ён падкрэсліў, што самае важнае пытанне — гэта далейшы продаж нафтапрадуктаў з перапрацаванай нафты: “Мы павінны сёння разгле­дзець пытанне, як і каму мы бу­дзем прадаваць. Як мы наогул арганізуем продаж гатовых нафтапрадуктаў. Гэта вельмі важнае пытанне сёння, і мы павінны ў гэтай няпростай сітуацыі атрымаць адпаведны эфект. Павышэнне продажу на экспарт нафтапрадуктаў, вырабленых нашымі заводамі, — гэта вялікі рэсурс”.

“Эканамічныя ўмовы, у якіх мы вымушаны праца­ваць, ус­кладняюцца, і мы гэта прызнаём. З-за ўвядзення Расійскай Федэрацыяй падатковага манеўру непазбежна зніжаюцца даходы рэспубліканскага бюджэту, пагаршаецца эфектыўнасць работы нашых нафтаперапрацоўчых заводаў. НПЗ сутыкнуліся з праблемай фінансавання бягучай дзейнасці і, што немалаважна, сваіх інвестыцыйных праграм, накіраваных на развіццё вытворчасці, — заявіў Аляксандр Лукашэнка. — Але я вам ужо гаварыў: гэтыя аргументы я нават браць пад увагу не хачу. Вайны няма. У свеце грошай шмат. Ёсць кіраўнікі канцэрнаў, ва ўрадзе віцэ-прэм’ер, кіраўнікі заводаў — вырашайце пытанні. Не можаце — ідзіце”.

Перад удзельнікамі нарады прэзідэнт паставіў шэраг пытанняў. Яны тычацца прагнозаў развіцця сусветнага рынку нафты і нафтапрадуктаў на най­бліжэйшы час і сярэднетэрміновую перспектыву, дзеянняў для папярэджвання магчымых негатыўных тэндэнцый, рэзерваў па павышэнні эфектыўнасці экспарту нафтапрадуктаў у існуючых умовах.

Прэзідэнт таксама пацікавіўся, як выконваецца яго патрабаванне аб арганізацыі паставак нафты, альтэрнатыўных расійскім.

Аляксандр Лукашэнка папярэдзіў удзельнікаў нарады аб персанальнай адказнасці за ўсе прапановы. “Нават калі на пасадзе не застануцца, будуць галавой адказваць за прынятыя рашэнні. Таму ніякіх асабістых інтарэсаў — толькі дзяржаўныя. Мы не космас вынаходзім, не новыя касмічныя апараты. Увесь свет працуе, прыкладаў шмат. Бярыце любы з іх і давайце ў гэтым напрамку дзейнічаць”, — сказаў ён.

Старшыня канцэрна “Белнафтахім” Андрэй Рыбакоў на нарадзе адзначыў, што для забеспячэння ўнутранага рынку Беларусі хапіла б 80-працэнтнай загрузкі аднаго нафтаперапрацоўчага завода. Краіна экспартуе каля 70 працэнтаў усіх вырабляемых нафтапрадуктаў.