Колькасць расіян, якія жадаюць аддаць дзяцей у ВНУ, за дзесяць апошніх гадоў знізілася ў два разы. Што прывяло да такіх змяненняў, расказала ў эфіры радыё Sputnik дырэктар Інстытута развіцця адукацыі НДУ ВШЭ Ірына Абанкіна.

За апошняе дзесяцігоддзе папулярнасць вышэйшай адукацыі сярод выпускнікоў школ знізілася амаль удвая, пра гэта сведчац­ь даныя апытання, праведзенага сэрвісам Superjob. У даследаванні прынялі ўдзел бацькі, чые дзеці скончаць школу ў 2021 годзе. Толькі 43% рэспандэнтаў заявілі, што іх дзіця пасля школы паспрабуе паступіць у ВНУ, у 2010 годзе такі адказ далі 80% апытаных.

На планы выпускнікоў і іх баць­коў перш за ўсё ўплывае фактар канкурэнцыі паміж вышэйшай і сярэдняй прафесійнай адукацыяй, лічыць Ірына Абанкіна.

“Попыт на сярэднюю прафесійную адукацыю моцна павялічыўся сярод навучэнцаў і 9-х, і 11-х класаў. У асобных рэгіёнах больш за 50% выпускнікоў пайшлі ў каледжы. Праграмы навучання там карацейшыя, адукацыя таннейшая, а працаўладкавацца лягчэй, так што такі крок выглядае апраўданым”, — адзначыла яна.

З іншага боку, новыя працоўныя месцы для выпускнікоў з вышэйшай адукацыяй уводзяцца не так хутка, а заробкі не адпавядаюць чаканням. “Як мінімум з 2014—2015 гадоў выпускнікі ВНУ з выхадам на рынак перасталі адчуваць сваю перавагу ў заробках, аддача ад вышэйшай адукацыі падала”, — лічыць І.Абанкіна.

У выніку пачалося фарміраванне альтэрнатыўных уяўленняў пра паспяховасць, якая не была тоесная вышэйшай адукацыі. Да таго ж ва ўмовах стагнацыі эканомікі выдаткі на паступленне і тым больш на вучобу ў ВНУ сталі занадта цяжкай ношай для многіх сем’яў.

“На гэтым фоне выйграюць каледжы, для паступлення ў якія не трэба здаваць АДЭ, там конкурс атэстатаў. А нават платныя праграмы навучання нашмат таннейшыя, чым у ВНУ”, — адзначыла яна.

Акрамя таго, пасля кале­джа пры жаданні можна паступіць у ВНУ — адразу на 2 ці 3 курс. Так што сярэдняя прафесійная адукацыя ў параўнанні з вышэйшай са­праўды мае шэраг канкурэнтных пераваг.

Падрыхтаваў Уладзімір МАТУСЕВІЧ.