38-я сесія Генеральнай канферэнцыі ЮНЕСКА завяршылася пацвярджэннем важнай ролі арганізацыі ў барацьбе з гвалтоўным экстрэмізмам і прасоўваннем парадку дня ў галіне ўстойлівага развіцця на перыяд да 2030 года. Пра гэта гаворыцца ў распаўсюджаным ЮНЕСКА прэс-рэлізе.
Гэтыя прыярытэты былі вылучаны беспрэцэдэнтнай колькасцю кіраўнікоў дзяржаў і ўрадаў, якія сабраліся ў ЮНЕСКА для ўдзелу ў сесіі. Падчас святкавання 70-годдзя ЮНЕСКА 16 і 17 лістапада адбыўся форум лідараў, які стаў пацвярджэннем салідарнасці міжнароднага таварыства з Францыяй пасля тэрактаў 13 лістапада і важнасці місіі ЮНЕСКА. На заключным пасяджэнні старшыня Генеральнай канферэнцыі Стэнлі Мутумба Сіматаа заявіў: “Нягледзячы на вельмі цяжкую сітуацыю, у якой апынулася прымаючая краіна, нашы абмеркаванні адзначаліся самым высокім узроўнем прадстаўніцтва дзяржаў-членаў. Я лічу, гэта падае магутны сігнал, што мы разам адмаўляемся паддавацца націску, пагрозам і спробам экстрэмістаў дэстабілізаваць сітуацыю”.
Генеральны дырэктар ЮНЕСКА Ірына Бокава падзякавала дзяржавам-членам за іх адданасць арганізацыі: “Гэта мае асаблівае значэнне пасля разбуральных тэрактаў, якія абрушыліся на Парыж 13 лістапада. Гэты злачынны акт насілля мае дачыненне да ўсіх нас. Тэрарысты атакуюць усё тое, што мы больш за ўсё шануем: свабоду, правы чалавека, годнасць кожнай жанчыны і кожнага мужчыны, наша пачуццё прыналежнасці да чалавецтва як да адзінага таварыства”. Прэзідэнт Францыі Франсуа Аланд выбраў ЮНЕСКА ў якасці подыума для свайго першага звароту да міжнароднага таварыства пасля тэрактаў 13 лістапада: “Якое месца больш за ўсё падыходзіць для пацвярджэння неабходнасці прытрымлівацца нашых прынцыпаў, як не ЮНЕ СКА — установа, якая з’явілася на свет з утопіі, якая заключалася ў аб’яднанні ўсяго чалавецтва з дапамогай навукі, адукацыі і культуры і якая набыла ў Парыжы гасцінны дом?” У сувязі з гэтым Генеральная канферэнцыя ЮНЕСКА прыняла стратэгію ўмацавання дзейнасці ЮНЕСКА ў галіне аховы культуры і садзейнічання культурнаму плюралізму ў выпадку ўзброенага канфлікту ў мэтах інтэграваць пытанні аховы культурнай спадчыны і разнастайнасці ў праграму гуманітарнай дзейнасці ў канфліктных і надзвычайных сітуацыях. Акрамя таго, на Генеральнай канферэнцыі адбылася важная дыскусія на тэму адукацыі ў мэтах супрацьдзеяння гвалтоўнаму экстрэмізму, якая была арганізавана ЮНЕСКА і ЗША пасля нядаўняга прыняцця рэзалюцыі аб адукацыі як спосабу прадухілення гвалтоўнага экстрэмізму. На сесіі дзяржавы-члены неаднаразова падкрэслівалі ролю школ у супрацьдзеянні экстрэмізму і падтрымцы каштоўнасцей свабоды, цярпімасці і недыскрымінацыі.
