Рэгістрацыя гранічных адпускных цэн выключыць магчымасць рэалізацыі лякарстваў па неабгрунтавана высокіх цэнах

У Беларусі прапануюць увесці механізм рэгістрацыі гранічных адпускных цэн вытворцаў на асобныя групы лякарстваў. Гэта прадугледжана праектам Указа “Аб пілотным праекце па рэгістрацыі гранічных адпускных цэн вытворцаў на лекавыя сродкі”, паведамілі ў Міністэрстве антыманапольнага рэгулявання і гандлю.

Пілотны праект прадугледжвае, што ў Беларусі будзе ўведзены механізм рэгістрацыі гранічных адпускных цэн вытворцаў на лякарствы, якія прымяняюцца для лячэння анкалагічных і сардэчна-сасудзістых захворванняў.

Як падкрэслілі ў МАРГ, механізм рэгістрацыі цэн, што прапануецца праектам указа, павінен выключыць магчымасць рэалізацыі лякарстваў пэўных груп па неабгрунтавана высокіх цэнах.

Плануецца, што ў 2018—2020 гадах трэба будзе рэгістраваць гранічныя адпускныя цэны вытворцаў на лякарствы па ўстаноўленым пераліку. Згодна з праектам дакумента, у яго ўвойдуць сродкі для лячэння сардэчна-сасудзістых (21 міжнароднае непатэнтаванае найменне) і анкалагічных (16 найменняў) захворванняў.

Вытворцы, які прысутнічаюць ужо на ўнутраным рынку, абавязаны будуць зарэгістраваць гранічныя адпускныя цэны на лякарствы з пераліку да 1 студзеня 2019 года. Калі цана вытворцы не будзе зарэгістравана, то прадаваць такое лякарства ў Беларусі з 1 студзеня будзе забаронена.

Згодна з праектам указа, МАРГ па ўзгадненні з Міністэрствам аховы здароўя зацвердзіць методыку разліку гранічных адпускных цэн вытворцаў на лякарствы пры іх рэгістрацыі (г.зн. алгарытм разліку гранічнай цаны і канкрэтныя крытэрыі, зыходзячы з якіх павінен ажыццяўляцца такі разлік). Пры гэтым у аснову будзе пакладзены прынцып рэферэнтнага цэнаўтварэння, г.зн. разлік гранічнай адпускной цаны зыходзячы са звестак аб цэнах вытворцы на лякарства ў рэферэнтных (падобных па ўмовах абарачэння лекавых сродкаў) краінах па пераліку, зацверджаным методыкай.

Прадугледжваецца таксама стварэнне дзяржаўнага рэестра (электроннай базы даных) гранічных адпускных цэн вытворцаў на лякарствы.

Ад эфектыўнасці пілотнага праекта будзе залежаць, ці распаўсюдзяць гэты вопыт на іншыя групы лекавых сродкаў.

Падрыхтаваны таксама праект пастановы Савета Міністраў, які будзе вызначаць парадак рэгістрацыі (перарэгістрацыі) гранічных адпускных цэн вытворцаў на лякарствы.

Адпаведныя праекты ўказа і пастановы ўрада будуць абмеркаваны на пасяджэнні грамадска-кансультатыўнага (экспертнага) савета пры МАРГ.