Эпідэміялагічная сітуацыя, якая склалася ва ўсім свеце, унесла пэўныя карэктывы ў дзейнасць усіх устаноў і арганізацый. У крыху іншым рэжыме функцыянуе цяпер і Магілёўскі дзяржаўны абласны інстытут развіцця адукацыі.

— Прыярытэтная ўвага ў нашай установе адукацыі зараз удзяляецца выкананню ўсіх неабходных мер па прафілактыцы вірусных зах­ворванняў. Захаванне простых правіл гігіены дазваляе істотна знізіць рызыку інфіцыравання рэспіраторнымі інфекцыямі, у тым ліку і інфекцыяй COVID-19. У МДАІРА строга выконваюцца ўсе рэкамендацыі Міністэрства аховы здароўя. Правілам № 1 медыцынскія работнікі называюць захаванне гігіены рук. Таму ва ўсіх месцах агульнага карыстання, кожным кабінеце і аўдыторыі ўстаноўлены дазатары з антысептычнымі сродкамі. Правілам № 2 з’яўляецца вільготная ўборка памяшкання, пастаянная дэзынфекцыя паверхняў. У інстытуце праводзіцца апрацоўка дзвяр­ных ручак, поручняў, сталоў, крэслаў, камп’ютарнай клавіятуры, тэлефонных апаратаў, аргтэхнікі, рэгулярна ажыццяўляецца праветрыванне памяшканняў. Правіла № 3 — сацыяльнае дыстанцыянаванне. Для яго выканання супрацоўнікі інстытута сталі часцей выкарыстоўваць у вырашэнні працоўных пытанняў унутраны камп’ютарны месенджар. І ён набыў вялікую папуляр­насць. Аказалася, што віртуальныя зносіны нічым не саступаюць рэальным, — расказаў рэктар МДАІРА М.М.Жудро.

З улікам штодзённых рэалій цяпер пабудавана і работа па павышэнні кваліфікацыі педагогаў. Супрацоўнікі інстытута вельмі паспяхова сталі выкары­стоўваць інструменты інфармацыйна-камунікацыйных тэхналогій. Правядзенне заняткаў па павышэнні кваліфікацыі пераведзена ў анлайн-рэжым. Педагогі рэгіёна аддалена слухаюць лекцыі, адказваюць на пытанні выкладчыкаў і метадыстаў, выконваюць тэсты, удзельніча­юць у дыскусіях.  Пасля заканчэння навучання, як звычайна, настаўнікі атрымліваюць пасведчанне аб праходжанні павышэння кваліфікацыі. Да таго ж лепшыя настаўнікі вобласці атрымалі магчымасць трансліраваць свой вопыт анлайн.

— Акрамя гэтага, мы рас­працавалі віртуальны партал для навучэнцаў і педагогаў вобласці. Інстытутам была праве­дзена вялікая работа па арганізацыі навучання з выкарыстаннем ІКТ. На працягу некалькіх тыдняў лепшыя педагогі Магілёў­шчыны ўдзельнічалі ў анлайн-ме­рапрые­м­ствах, асноўнай мэтай якіх было стварэнне матэрыялаў у дапамогу настаўніку па арганізацыі дыстанцыйнага адукацыйнага працэсу, — адзна­чыў Міхаіл Міхайлавіч.

Нягледзячы на няпростую эпідэміялагічную сітуацыю, у МДАІРА плануюць працягваць выконваць усе пастаўленыя перад установай задачы, усебакова дапамагаць педагогам у арганізацыі якаснага навучання і выхавання.

Ганна СІНЬКЕВІЧ.
Фота прадастаўлена Магілёўскім дзяржаўным абласным інстытутам развіцця адукацыі.