На пачатку чэрвеня зарэгістраваны Статут Гомельскай абласной асацыяцыі школьнага спорту. Яна ўзнікла як рэгіянальнае аддзяленне Беларускай асацыяцыі школьнага спорту, асноўнай мэтай дзейнасці якой з’яўляецца яго развіццё, у тым ліку юных спартсменаў, а таксама іх падрыхтоўка да ўдзелу і ўдзел у розных фізкультурна-аздараўленчых і спартыўных мерапрыемствах.
Дырэктар Гомельскага абласнога цэнтра фізічнага выхавання і спорту навучэнцаў і студэнтаў Вольга Ярмоленка расказвае, што, акрамя таго, задачамі з’яўляюцца ажыццяўленне супрацоўніцтва і падтрыманне кантактаў з іншымі нацыянальнымі асацыяцыямі (саюзамі) школьнага спорту, Міжнароднай федэрацыяй школьнага спорту, прадстаўленне інтарэсаў членаў асацыяцыі ў міжнародных арганізацыях:
— Таксама важная задача — абагульненне вопыту работы членаў асацыяцыі па развіцці школьнага спорту, удзел у распрацоўцы праектаў нарматыўных актаў, што рэгулююць дзейнасць у сферы развіцця спорту ва ўстановах агульнай сярэдняй адукацыі… Між тым дзеці з Гомельшчыны другі год запар годна прадстаўляюць рэгіён на алімпіядзе па вучэбным прадмеце “Фізічная культура і здароўе”. Летась нашы школьнікі прывезлі пяць дыпломаў, а сёлета — чатыры дыпломы і два падзячныя водзывы. Гэта дазволіла зборнай камандзе Гомельскай вобласці трапіць у прызавую тройку па колькасці набраных дыпломоў.
Вольга Леанідаўна гаворыць, што па выніках 2019/2020 навучальнага года можна зрабіць выснову пра эфектыўнасць арганізаванай сістэмы фізічнага выхавання ва ўстановах адукацыі Гомельскай вобласці:
— Прафесіяналізм і адказнасць настаўнікаў і выкладчыкаў фізічнай культуры і здароўя ўстаноў адукацыі, уменне паставіць мэту і выбраць шляхі яе дасягнення дазволілі годна прадставіць Гомельскую вобласць на рэспубліканскіх спаборніцтвах. Навучэнцы ўстаноў прафесійна-тэхнічнай адукацыі сталі пераможцамі і прызёрамі рэспубліканскіх спаборніцтваў і заваявалі тры першыя месцы, тры другія і два трэція месцы. Як вынік — 1-е агульнакаманднае месца ў рэспубліканскай спартакіядзе сярод устаноў прафесійнай адукацыі. Навучэнцы ўстаноў сярэдняй спецыяльнай адукацыі сталі прызёрамі і заваявалі тры другія і чатыры трэція месцы і занялі 4-е агульнакаманднае месца сярод устаноў сярэдняй спецыяльнай адукацыі. Вучні сярэдніх школ у рэспубліканскім спартыўна-масавым мерапрыемстве “300 талентаў для Каралевы” заваявалі 1-е агульнакаманднае месца. У рэспубліканскім спартыўна-масавым мерапрыемстве сярод дзяцей і падлеткаў па лёгкай атлетыцы “Шкаліяда” — 3-е месца. У спартакіядзе па праграме зімовага і летняга мнагаборства “Абаронца Айчыны” сярод юнакоў дапрызыўнага і прызыўнога ўзросту — 2-е агульнакаманднае месца.
Для спартыўна адораных навучэнцаў у 54 установах агульнай сярэдняй адукацыі Гомельшчыны створана 108 спецыялізаваных па спорце класаў. Іх наведваюць 2238 спартсменаў, якія займаюцца баскетболам, валейболам, гандболам, футболам, хакеем, плаваннем, лёгкай атлетыкай, барацьбой, гімнастыкай, фігурным катаннем, веславаннем, веласпортам, водным пола, настольным тэнісам, стральбой, фрыстайлам, пяціборствам. Такія класы дазваляюць дзецям паспяхова сумяшчаць вучэбную і спартыўную дзейнасць.
— Акрамя таго, — адзначае Вольга Ярмоленка, — ва ўсіх установах агульнай сярэдняй адукацыі вобласці спартыўныя аб’екты працуюць да 20:00. Гэта дазваляе навучэнцам у адпаведнасці са сваімі інтарэсамі наведваць факультатывы, секцыі, аб’яднанні спартыўнай накіраванасці.
У сістэме адукацыі Гомельскай вобласці пастаянна праводзіцца планамерная работа па ўмацаванні вучэбна-спартыўнай базы спартыўным інвентаром і абсталяваннем, праведзена пашпартызацыя спартыўных аб’ектаў, якія стаяць на балансе ўстаноў адукацыі.
Па выніках пашпартызацыі аддзелы адукацыі, спорту і турызму райвыканкамаў распрацавалі рэгіянальныя праграмы правядзення рамонтных работ будынкаў спартыўнага прызначэння, плоскасных спартыўных збудаванняў, спартыўных ядраў устаноў адукацыi да 2022 года. Рэалізацыя гэтых праграм дазволіць выконваць вучэбную праграму па прадмеце “Фізічная культура і здароўе” ў поўным аб’ёме з выкананнем правіл бяспекі.
Ірына АСТАШКЕВІЧ.