Спраектавалі “Сямейнае дрэва”

- 10:44Навіны рэгіёнаў

Сацыяльны праект удзельнікаў “Летняга ўніверсітэта — 2021”, распрацаваны студэнтамі ГДУ імя Ф.Скарыны, увайшоў у тройку лепшых у Расіі. 

Як расказаў дэкан факультэта псіхалогіі і педагогікі ГДУ імя Ф.Скарыны Уладзіслаў Бейзераў, праект “Падары сямейнае дрэва”, накіраваны на паляпшэнне экалагічнай сітуацыі і ўмацаванне сямейных каштоўнасцей і традыцый, заняў 3-е месца сярод 105 праектаў-удзельнікаў ад 12 устаноў вышэйшай адукацыі.

Беларускія студэнты Гомельскага дзяржаўнага ўніверсітэта імя Ф.Скарыны і Магілёўскага дзяржаўнага ўніверсітэта імя А.А.Куляшова асвоілі адукацыйны курс “Асновы сацыяльнага праектавання”. Студэнты азнаёміліся з базавымі прынцыпамі стварэння, рэалізацыі і наступнай адзнакі вынікаў сацыяльных праектаў, навучыліся вызначаць мэты праекта і прагназаваць яго вынікі. Дзеці з Беларусі прайшлі інтэнсіўнае навучанне па дадатковых агульнаадукацыйных праграмах, атрымалі новыя кампетэнцыі і цікавы вопыт. Для студэнтаў у інтэрактыўным фармаце праведзены адукацыйныя інтэнсівы, прысвечаныя кампетэнцыям будучыні.

Ірына АСТАШКЕВІЧ.