Для амаль 6 тысяч навучэнцаў Вілейскага раёна 1 верасня адчыняць дзверы 20 устаноў агульнай сярэдняй адукацыі і 19 устаноў дашкольнай адукацыі. Аб дасягненнях сістэмы і планах на будучыню расказаў начальнік упраўлення па адукацыі, спорце і турызме Вілейскага райвыканкама Аляксандр Часлававіч ПУЦЭЙКА.
— Падрыхтоўка да новага навучальнага года ў раёне вялася на працягу апошніх трох месяцаў, — заўважыў Аляксандр Часлававіч. — Зроблена нямала: бягучыя і капітальныя рамонты, добраўпарадкаванне прылеглых тэрыторый і спартыўных стадыёнаў, набыты сродкі навучання і вучнёўская мэбля. Пры фінансавай падтрымцы Сусветнага банка ў рамках праекта “Мадэрнізацыя сістэмы адукацыі” завершана першая чарга рэканструкцыі Даўгінаўскай сярэдняй школы. Да пачатку навучальнага года будуць адкрыты футбольная пляцоўка са штучным пакрыццём на тэрыторыі сярэдняй школы № 1 і баскетбольна-валейбольная пляцоўка са штучным пакрыццём у сярэдняй школе № 5 Вілейкі.
— Раскажыце, калі ласка, пра дасягненні навучэнцаў раёна за апошні час.
— За апошнія 3 гады атрыманы 71 дыплом на абласным этапе і 13 дыпломаў на заключным этапе рэспубліканскай алімпіяды. Стабільна высокія вынікі дэманструюць навучэнцы гімназіі № 1 “Логас”, гімназіі № 2, сярэдняй школы № 3 Вілейкі. Па выніках рэспубліканскага конкурсу навуковых краязнаўчых работ навучэнцаў дыпломам I ступені ўзнагароджаны дзесяцікласнік Вілейскай гімназіі № 2 Уладзіслаў Хмарэнка. Яго падрыхтаваў настаўнік беларускай мовы і літаратуры настаўнік-метадыст Віктар Віктаравіч Кажура. Па выніках рэспубліканскага этапу 50-га Міжнароднага маладзёжнага конкурсу сачыненняў эпісталярнага жанру 1-е месца прысуджана вучню Нарацкай сярэдняй школы Глебу Клімовічу (кіраўнік — Кацярына Сяргееўна Пляско, настаўніца беларускай мовы і літаратуры). Работа Глеба сёлета прадставіла Беларусь на міжнародным этапе конкурсу ў Берне (Швейцарыя). Педагогі Вілейскага раёна таксама ўнеслі свой уклад у распрацоўку адзінага інфармацыйна-адукацыйнага рэсурсу краіны.
— Якая інавацыйная і педагагічная дзейнасць ажыццяўляецца ў раёне?
— У 2021/2022 навучальным годзе плануецца рэалізацыя 6 інавацыйных і 7 педагагічных праектаў. Распрацаваны 14 гуманітарных праектаў, якія будуць рэалізаваны пры наяўнасці замежных спонсараў. У мінулым навучальным годзе завяршыўся інавацыйны праект “Укараненне мадэлі маральнага развіцця навучэнцаў у сучаснай адукацыйнай прасторы на праваслаўных традыцыях і каштоўнасцях беларускага народа з улікам рэгіянальнага сацыякультурнага кластара” ў Вілейскай гімназіі № 2. Прызнаны паспяховым і прапанаваны да распаўсюджвання педагагічны вопыт ясляў-сада № 11 Вілейкі “Метадычнае суправаджэнне працэсу фарміравання інклюзіўнай культуры ўдзельнікаў адукацыйнага працэсу ва ўмовах рэсурснага цэнтра”.
— Як арганізавана профільнае навучанне і прафесійная падрыхтоўка ў вашым раёне?
— Назіраецца тэндэнцыя да павелічэння колькасці навучэнцаў, якія вывучаюць асобныя прадметы на павышаным узроўні на III ступені агульнай сярэдняй адукацыі. Для навучэнцаў 10—11 класаў у раёне функцыянуюць 1 клас і 5 груп педагагічнай накіраванасці і 2 групы аграрнай накіраванасці. У мінулым навучальным годзе 74 навучэнцы 10 класа і 76 навучэнцаў 11 класа асвойвалі адукацыйную праграму прафесійнай падрыхтоўкі рабочых (служачых) у рамках вучэбнага прадмета “Працоўнае навучанне” па 8 спецыяльнасцях. Кантынгент навучэнцаў устаноў прафесійнай адукацыі фарміруецца ў адпаведнасці з іх запытамі, магчымасцямі ўстаноў адукацыі і з улікам запатрабаванасці ў раёне спецыялістаў сельскай гаспадаркі. Так, у 2021/2022 навучальным годзе на базе Ільянскага дзяржаўнага аграрнага каледжа будзе арганізавана прафесійная падрыхтоўка навучэнцаў па спецыяльнасці “Жывёлавод” (12 чалавек), на базе Вілейскага дзяржаўнага каледжа навучанне будзе весціся па спецыяльнасці “Слесар па рамонце сельскагаспадарчых машын і абсталявання” (22 вучні 10 класа, 15 вучняў 11 класа).
— Якая ўвага ўдзяляецца выхаваўчай рабоце, шматбаковаму развіццю навучэнцаў?
— Адным з сапраўдных цэнтраў выхавання любові да сваёй Айчыны і яе гісторыі з’яўляюцца школьныя музеі. У 14 агульнаадукацыйных установах раёна функцыянуюць 15 музеяў па 5 профілях, пераважна краязнаўчага кірунку. Наша гордасць — народны краязнаўчы музей “Ільянскія далягляды” і народны літаратурны музей “Вілейшчына літаратурная” Ільянскай сярэдняй школы імя А.А.Грымаця. Аб шматбаковым развіцці вучняў сведчаць іх дасягненні. У фінальным спаборніцтве рэспубліканскай інтэлектуальна-забаўляльнай гульні “Акцябрацкі квіз” у бягучым годзе каманда сярэдняй школы № 5 Вілейкі заняла 2-е месца. У лютым 2021 года прайшоў фінальны этап рэспубліканскіх спаборніцтваў сярод дзяцей і падлеткаў па біятлоне “Снежны снайпер” на прызы Прэзідэнцкага спартыўнага клуба. У каманду Мінскай вобласці ўвайшлі навучэнцы нашага раёна. Штогод значных поспехаў дасягаюць навучэнцы раёна ў рэспубліканскай спартакіядзе навучэнцаў па тэхнічных відах спорту “ТэхнаСпорт”. Так, у бягучым годзе ў XIX Рэспубліканскай спартакіядзе ў кірунку “Суднамадэльны спорт” навучэнцы Вілейскага раённага цэнтра дадатковай адукацыі дзяцей і моладзі ўзнагароджаны дыпломамі I, ІІ і ІІІ ступені. У кірунку “Ракетамадэльны спорт” Яўген Міклуш заваяваў дыплом ІІІ ступені. Па выніках спаборніцтваў сярод юнакоў старэйшай узроставай групы Яўген Кузьміч, навучэнец Вілейскай гімназіі № 1 “Логас”, заняў 3-е месца. У рэспубліканскім конкурсе навукова-тэхнічнай творчасці навучэнскай моладзі “ТэхнаІнтэлект” дыплом І ступені заваяваў Аляксандр Шышко, навучэнец Нарацкай сярэдняй школы. У абласным фестывалі-конкурсе “Дзівосны свет дзяцінства” калектыў ДЦРД Вілейкі заваяваў прызавыя дыпломы.
— Ці адбываюцца ў сістэме адукацыі Вілейскага раёна брэндавыя мерапрыемствы?
— Працягвае сваю дзейнасць клуб “Сябры Новага тэатра”, створаны ў 2016 годзе. Каардынатарам праекта з’яўляецца настаўніца рускай мовы і літаратуры сярэдняй школы № 3 Вілейкі Алеся Аліеўна Валчкова. У яе суправаджэнні навучэнцы ўстаноў адукацыі не проста наведваюць (4—5 разоў у год) спектаклі Новага драматычнага тэатра Мінска, але і абмяркоўваюць іх у сценах тэатра з майстрамі сцэны. Штогод, пачынаючы з 2007 года, у летнія месяцы праходзіць водная экспедыцыя “Шляхам графа Канстанціна Тышкевіча”. Сёлета экспедыцыя адбылася ў ліпені з удзелам дарослых і дзяцей Вілейскага, Смаргонскага, Мінскага, Навагрудскага раёнаў і Мінска. Узначаліў групу яе нязменны кіраўнік, заўзяты турыст і нястомны энтузіяст Міхаіл Петух, педагог раённага цэнтра дадатковай адукацыі, кіраўнік дзіцячага турыстычнага клуба “Чарапашкі”. Падарожжа было прысвечана 165-годдзю краязнаўча-этнаграфічнай экспедыцыі графа Канстанціна Тышкевіча па рацэ Віліі, па выніках якой была выдадзена кніга “Вілія і яе берагі”. У раёне штогод з 2011 года праходзіць раённы пленэр юных мастакоў, прысвечаны акадэміку, мазаісту, жывапісцу, нашаму земляку Н.Ю.Сілівановічу. Сёлета пленэр прысвячаўся памяці знакамітых людзей Вілейшчыны і 80-годдзю пачатку Вялікай Айчыннай вайны.
Надзея ЦЕРАХАВА.