У невінаватасці мужчынскай зборнай па веславанні на байдарках і каноэ беларускі бок быў абсалютна ўпэўнены. Аб гэтым заявіў генеральны сакратар Нацыянальнага алімпійскага камітэта Беларусі Анатоль Котаў на прэс-канферэнцыі, прысвечанай рашэнню аб адмене гадавой дыскваліфікацыі каманды.
“Нам удалося выканаць задачу, пастаўленую кіраўніком дзяржавы, які справу аб нашых спартсменах трымаў на персанальным кантролі. Дакладная пазіцыя Прэзідэнта Беларусі: усе сумленныя спартсмены павінны быць абаронены. У невінаватасці беларускіх весляроў мы былі абсалютна ўпэўнены. Адзначу, што на наступны дзень пасля таго, як стала вядома аб рашэнні адхіліць каманду па веславанні на байдарках і каноэ, у НАК прыйшлі каля ста алімпійцаў і падпісаліся пад калектыўным зваротам у Міжнародны алімпійскі камітэт (МАК) аб абароне гонару атлетаў, якія былі незаконна (цяпер ужо ні ў кога не засталося сумненняў) адхілены ад галоўнага старту чатырохгоддзя”, — расказаў Анатоль Котаў.
Напярэдадні Міжнародны арбітражны спартыўны суд зняў аднагадовае пакаранне з мужчынскай зборнай Беларусі па веславанні на байдарках і каноэ, накладзенае Міжнароднай федэрацыяй каноэ (ICF) з-за падазрэнняў у парушэнні антыдопінгавых правіл. Істцом да ICF у Міжнародным спартыўным судзе ў Лазане выступіў Нацыянальны алімпійскі камітэт Беларусі.
