У Гродне стартаваў інавацыйны праект “Укараненне мадэлі фарміравання і развіцця камунікатыўнай кампетэнцыі тых, хто вучыцца ў сістэме ўзаемадзеяння ўстаноў адукацыі і дзіцячых, маладзёжных грамадскіх аб’яднанняў”, што разлічаны на 2020—2023 гады. У праекце прымаюць удзел 55 устаноў адукацыі, з іх 8 — ад Гродзенскай вобласці.
Праведзена ўстановачная сустрэча педагогаў з кансультантам інавацыйнага праекта намеснікам начальніка цэнтра ідэалагічнай, выхаваўчай і сацыяльнай работы Гродзенскага абласнога інстытута развіцця адукацыі Людмілай Кіўлюк. Падчас гэтай сустрэчы разглядаліся пытанні арганізацыі інавацыйнай дзейнасці.
Рабочы, практыка-арыентаваны фармат правядзення сустрэчы падтрымала метадыст інстытута Марына Кійко, што дапамагло ўдзельнікам вырашыць праблемы арганізацыйна-кіраўніцкага характару. Педагогі-інаватары змаглі самавызначыцца і скарэкціраваць тэмы даследаванняў адносна зацверджанай мадэлі, убачыць рэальныя перспектывы і ўдакладніць для сябе чаканыя вынікі, прапісаныя ў праекце. Былі ўнесены карэктывы ў каляндарныя планы рэалізацыі праекта ў новым навучальным годзе.
Кансультант выбудавала прафесійныя адносіны з кожным педагогам, выкарыстоўваючы метады коўчынгу, каб выявіць іскрынку ў дзейнасці кожнага спецыяліста і ў далейшым на яе абаперціся. Улічаны асаблівасці дзейнасці педагогаў, якія ўдзельнічаюць у інавацыйнай дзейнасці і ва ўстановах агульнай сярэдняй адукацыі, і ва ўстановах дадатковай адукацыі дзяцей і моладзі.
Падчас сустрэчы была аказана дапамога інаватарам, якія разбіраліся ў пытаннях педагагічнай дыягностыкі па выбранай імі тэме даследавання. Удзельнікі ўдакладнілі ролю школьнага педагога-псіхолага ў псіхалагічным суправаджэнні інавацыйных працэсаў ва ўстанове адукацыі.
Кансультант рэкамендавала спосабы падключэння да рэалізацыі інавацыйнага праекта не толькі педагогаў, чые прозвішчы зацверджаны загадам дырэктара ўстановы адукацыі, але і ўсяго педагагічнага калектыву школы.
— Установачная сустрэча педагогаў нездарма прайшла ў сярэдняй школе № 11 Гродна, — адзначыла Людміла Кіўлюк. — Комплекснае навучанне каманд — удзельнікаў 8 устаноў адукацыі ў праекце — прайшло на прыкладзе дзейнасці членаў творчай групы інаватараў сярэдняй школы № 11. Тут нам спачатку прадставілі наяўныя напрацоўкі, якія вызначылі актуальнасць праекта для школьнага калектыву. Затым мы наведалі музей воінскай славы, азнаёміліся з прадуктамі дзейнасці бізнес-кампаніі, творчай візітоўкай пераможцы конкурсу “Лідар”.
Як падкрэсліла Людміла Кіўлюк, падчас сустрэчы былі зняты педагагічныя цяжкасці, зроблены канкрэтныя крокі да ажыццяўлення задуманага на практычным этапе, а значыць, рэалізацыя інавацыйнага праекта будзе на новым, якасным узроўні.
Ірына АНІКЕВІЧ.
Фота аўтара.