Свет знаходзіцца ў пошуку новай формулы бяспекі

- 11:43Інфармацыйная гадзіна

Беларусь паслядоўна выступае за вырашэнне ўсіх спрэчных пытанняў у сферы бяспекі выключна шляхам перагавораў. Аб гэтым заявіў старшыня праўлення Цэнтра вывучэння знешняй палітыкі і бяспекі Андрэй Русаковіч у Мінску на міжнародным семінары “Міжнародная бяспека і НАТА ў 2018 годзе”.

“Форум стаў ужо традыцыйным, яго значэнне як запатрабаванай і прафесійнай пляцоўкі для дыскусій па актуальных пытаннях міжнароднага парадку дня агульнапрызнана, — адзначыў Андрэй Русаковіч. — Тэматыка семінара вельмі шырокая, аднак ключавым момантам нязменна з’яўляюцца пытанні міжнароднай бяспекі”.

Як вядома, ацэнкі існуючай сітуацыі ў гэтай сферы розныя. “Напрыклад, ёсць пункт гледжання, згодна з якім планета знаходзіцца на мяжы глабальнага канфлікту, ледзь не напярэдадні пачатку Трэцяй сусветнай вайны. Іншыя палітыкі і эксперты сцвярджаюць, што нічога экстраардынарнага ў цяперашняй сітуацыі няма, адбываецца даволі складаны і неадназначны працэс перебалансіроўкі, міжнароднай мадэрнізацыі, характэрны для ўсёй шматвяковай гісторыі чалавецтва”, — дадаў ён.

Як падкрэсліў Андрэй Русаковіч, свет знаходзіцца ў пошуку новай формулы бяспекі. “І тут важна адзначыць наступнае: усе ўдзельнікі міжнародных адносін павінны прыйсці да разумення таго простага, на першы погляд, факта, што сучаснасць мае патрэбу ў прынцыпова новай філасофіі бяспекі. Пры сучасным узроўні развіцця ўзбраенняў відавочна, што ў эскалацыі процістаяння і магчымым ваенным канфлікце не можа быць пераможцаў. Прайграюць усе. І перш за ўсё — людзі. Таму менавіта інтарэсы чалавека як галоўнага суб’екта адносін павінны быць пакладзены ў аснову новай філасофіі бяспекі”, — перакананы кіраўнік Цэнтра вывучэння знешняй палітыкі і бяспекі.

Андрэй Русаковіч звярнуў увагу ўдзельнікаў семінара на беларускія ідэі новага Хельсінкскага працэсу; падыходы, накіраваныя на ператварэнне краін Усходняй Еўропы ў трансгранічны пояс стабільнасці і ўзаемадзеяння; прапановы па забеспячэнні міру на паўднёвым усходзе Украіны. “Трэба падкрэсліць, што менавіта аб’яднальная, не канфрантацыйная палітыка з’яўляецца найважнейшай складовай часткай знешнепалітычнай ідэнтычнасці беларускай дзяржавы”, — падкрэсліў Андрэй Русаковіч.

Ён таксама выказаў удзячнасць суарганізатарам мерапрыемства: Дэпартаменту публічнай дыпламатыі арганізацыі Паўночнаатлантычнага дагавора, Фонду імя Конрада Адэнаўэра, кантактнаму пасольству НАТА ў Беларусі, якім з’яўляецца эстонская дыпмісія.