Настаўніца англійскай і нямецкай моў сярэдняй школы № 4 Іванава Таццяна Юхнік расказала карэспандэнту “Настаўніцкай газеты” пра свае незвычайныя заалагічна-батанічныя захапленні.
…Залатыя фазаны ўміг разляцеліся па клетцы, таму што з’яўляюцца баязлівымі птушкамі. Рознакаляровыя прыгажуны-самцы супакоіліся хутчэй, чым шэракарычневыя, падобныя да курапатак, самкі.
— За прыгажосць гэтых птушак і трымаю. І яйкі ў іх больш карысныя, чым курыныя, — усміхаючыся, знаёміць з рэдкімі для мясцовасці эксклюзіўнымі птушкамі іх гаспадыня-заводчыца.
Таццяна Юхнік вядомая сваімі незвычайнымі заалагічна-батанічнымі захапленнямі.
— Пачалося ўсё з таго, што купіла інкубатар, а таксама 10 інкубацыйных яек, з якіх вывелася шэсць куранят:
два пеўнікі і чатыры курачкі — спрыяльнае спалучэнне для стварэння фазанавай сям’і. З-за прыгажосці фазанаў-самцоў гэтых птушак сталі разводзіць у Еўропе і на іншых кантынентах для ўпрыгожвання заапаркаў, птушкаферм і прыватных падворкаў. З такой эстэтычнай мэтай развяла іх у сябе і я. Муж Міхаіл, вітаючы мае пачынанні, зрабіў для фазанаў вальеру, дзе яны нават зімуюць. Сілкуюцца залатыя фазаны, як і хатнія куры: ядуць зерне пшаніцы, трыцікале, любяць зеляніну гатункавай травы. Вельмі падабаецца птушкам зерне кукурузы — здзёўбваюць прама з катаха ўшчэнт. Але фазаны, асабліва самкі, птушкі з характарам. Яны могуць весці барацьбу за захоп гнязда, каб адкласці яйка. Для бяспекі на дзюбу нясушак надзяваю шоры-акуляры, — тлумачыць Таццяна.
Завесці райскіх птушак фазанаў Таццяне было нескладана, бо да гэтага яна займалася перапёлкамі. Зараз у закрытай вальеры, таксама зробленай мужам, знаходзіцца больш за 200 перапёлак. Жывуць птушкі ў вялікай цеснаце, па тэхналогіі закладваецца 15 см плошчы на галаву, каб увесь час захоўвалася цяпло. За дзень перапёлкі нясуць як мінімум 70 яек. У адрозненне ад хатніх курэй, яны з’яўляюцца яйканоснымі круглы год.
У маладой і прыгожай мамы тры дачкі: Каця (скончыла першы курс сталічнага медуніверсітэта) і школьніцы Паліна і Аня. У раннім узросце дзяўчынкі часта хварэлі, бацькі Юхнік вырашылі змяніць дзіцячы рацыён харчавання, узяўшы за аснову натуральныя прадукты. Каця з Палінай спачатку крывіліся ад маленькіх вараных стракатых яек, а маленькая Аня адразу стала піць іх сырымі.
Яшчэ Таццяна Юхнік марыць завесці эму — птушку, падобную на страуса. Прычым купіць не гатовае птушаня, а вывесці яго з яйка, што значна цікавей.
Прысядзібны ўчастак замалы для гэтага: у эму даўжыня цела большая за 2 метры, і бегае гэтая аўстралійская птушка з хуткасцю 50 км у гадзіну. Разгоніцца раз-другі — бывай, агарод: кветкі, ягады, агуркі і памідоры. Гэта і стрымлівае азартную Таццяну Юхнік, тым больш што яе прысядзібная фларыстыка нагадвае кавалачак батанічнага саду.
Буйныя шматгадовыя расліны хаста і юка, кусты шыкоўных руж, лекавыя травы для чаёў і іншыя экзоты растуць на невялікім участку. Кусты высакарослых буякоў даўно сталі брэндавымі раслінамі, якія даюць багаты ўраджай. Каштоўныя і самыя вялікія ягады кавуны таксама выспяваюць на цуда-агародзе. Садовых дрэў няшмат, але, акрамя традыцыйных яблынь, груш і сліў, тут растуць персік, абрыкос і нават хурма. Рука ў гаспадыні лёгкая, зямля ўрадлівая, таму Юхнікі заўсёды з ураджаем.
На дачок Паліну і Аню ўжо можна пакінуць перапёлак і фазанаў — накормяць і напояць іх. А без залатых рук мужа Міхаіла, які выбудаваў сістэму кармлення і паення птушак, арашэння раслін, гаспадарка не была б
такой квітнеючай.
Тамара ХАМІЦЭВІЧ
Фота аўтара
