Сёння ў краіне стартавала цэнтралізаванае тэсціраванне. Сёлета на іспыт па беларускай мове, які пачынае ўступную кампанію, зарэгістравалася 17,9 тысячы чалавек. Таксама 3 тысячы бланкаў з заданнямі на беларускай мове будуць выкарыстаны ў цэнтралізаваным тэсціраванні па іншых прадметах.

Для ўдзелу ў тэсціраванні па беларускай мове сёлета зарэгістравалася 17,9 тысячы выпускнікоў (у 2020 годзе — 18,6 тысячы, у 2019 годзе — 22 тысячы). Выпрабаванне пра­ходзіла ў 37 пунктах цэнтралізаванага тэсціравання (усяго ж у кампаніі будзе за­дзейнічаны 41 пункт). Традыцыйна сустрэў абітурыентаў і Беларускі дзяржаўны ўніверсітэт: тут тэсціраванне па беларускай мове прахо­дзілі 785 хлопцаў і дзяўчат. Для размяшчэння ўдзельнікаў за­дзейнічалі 21 аўдыторыю.

Па словах адказнага сакратара прыёмнай камісіі БДУ Уладзіміра Сцяпанава, найбольш запатрабаванымі ў абітурыентаў, якія здаюць іспыты ў гэтым ўніверсітэце,  сёлета аказаліся руская і англійская мовы, матэматыка і грамадазнаўства. ЦТ па рускай мове будзе арганізавана ў два дні (за гэты час іспыт прой­дуць 2450 чалавек), а тэсціраванне па англійскай мове аб’яднае 1740 абітурыентаў.

Уладзімір Андрэевіч удакладніў нумарацыю карпусоў універсітэта, дзе сёлета прой­дзе тэсціраванне (змены выкліканы рамонтам галоўнага корпуса). Так, абітурыенту, у пропуску якога стаіць ліч­ба 1, трэба шукаць сябе ў спісах карпусоў фізічнага, хімічнага, юрыдычнага і факультэта геаграфіі і геаінфарматыкі. Корпус № 2 — гэта тэрыторыя філалагічнага факультэта, а корпус № 3 прадстаўлены аўдыторыямі факультэта журналістыкі.

Паназіраць за арганізацыяй тэсціравання і падтрымаць абітурыентаў на старце ўступнай кампаніі ў БДУ завітаў старшыня Дзяржаўнай камісіі па кантролі за ходам уступных выпрабаванняў віцэ-прэм’ер Ігар Петрышэнка.

— Найбольш масавым прадметам, як і раней, застаецца руская мова. Для таго каб студэнтам было больш камфортна, іспыт па гэтым прадмеце і ма­тэматыцы па­дзялілі на два дні. Сёлета на ЦТ па рускай мове зарэгістравалася каля 50 тысяч чалавек. У сувязі з гэтым хацелася б нагадаць абітурыентам, каб яны з’яўляліся на тэсціраванне па рускай мове і ма­тэматыцы ў дзень, пазначаны ў пропуску, — сказаў Ігар Віктаравіч. — У аўдыторыях мы ўбачылі, што абітурыенты засяро­джаны, настроены на паспяховае выкананне тэстаў.

Ігар Петрышэнка заўважыў, што ў гэтым годзе правілы атрымання сертыфіката ЦТ больш строгія і ўпарадкаваныя: дакумент будзе выдавацца асобам, якія прадаста­вяць атэстат. Для людзей, якія атрымліваюць другую вышэйшую адукацыю, пытанне бу­дзе вырашацца па выніках субяседавання. Такі падыход, па словах Ігара Віктаравіча, дазволіць выключыць выпадкі нематываванасці ўдзельнікаў і бязмэтавай праверкі ведаў тых, хто не збіраецца пасту­паць у бягучым годзе.

— Цэнтралізаванае тэсціраванне — гэта своеасаблівае спаборніцтва, у якім павінна быць сумленная перамога. Перамога ў дэманстрацыі ведаў, ва ўласнай стрэсаўстойлівасці, якасці засваення школьнай праграмы. Паспяховая здача ЦТ — цаглінка ў фарміраванні будучай асобы, — перакананы Ігар Петрышэнка.

Ірына ІВАШКА.
Фота Алега ІГНАТОВІЧА.