Бабровіцкая сярэдняя школа Іўеўскага раёна літаральна патанае ў зеляніне дрэў. Астраўкі з дэкаратыўных кустоў і шматгадовых кветак гарманічна ўпісваюцца ў ландшафт. Упершыню яны ўпрыгожылі школьную тэрыторыю 9 гадоў назад з прыходам новага кіраўніка Ніны Тулько. Падрабязнасці — у матэрыяле карэспандэнта “Настаўніцкай газеты”.
— Ужо шмат гадоў дарога да цэнтральнага ўвахода ідзе праз пышную алею галінастых клёнаў і каштанаў. Заклалі яе яшчэ ў пачатку гісторыі школы, і сёння гэтая зялёная сцежка робіць нашу тэрыторыю адметнай. Прычым яна прыцягвае ўвагу не толькі людзей. Некалькі гадоў назад школьны парк стаў домам для вавёрак і савы, за якімі дзеці з цікавасцю назіраюць, — адзначае Ніна Іосіфаўна.
Захоўваючы ўнікальнасць школьнай тэрыторыі, тут аддаюць перавагу дэкаратыўным кустам і лясным елачкам, якія пры належным доглядзе пышна разрастаюцца.
— Але сёлета ў нас з’явіліся і яркія акцэнты. На тэрыторыі для дашкольнікаў цвіце клумба ў форме чырвонай зоркі, а ля галоўнага ўвахода — лічба 80 з аксамітак, — працягвае кіраўнік.
Гэтая лічба падкрэслівае не толькі значнасць юбілею Вялікай Перамогі. Надыходзячы навучальны год стане для ўстановы 80-м у яе гісторыі, і да святочнай даты ўсе актыўна рыхтуюцца.
— Больш за паўстагоддзя назад каля школы з’явіўся валун. Тэрыторыю вакол яго мы абыгралі зялёнымі насаджэннямі, і сёлета на ім з’явіцца металічная таблічка з гравіроўкай асноўных этапаў гісторыі школы, — гаворыць Ніна Тулько.
За школьнай тэрыторыяй у некалькі гектараў сочыць лабарант Алена Каспяровіч, і ў яе заўсёды дастаткова памочнікаў. Гэта не толькі школьнікі, якія летам прыходзяць на практыку або займаюцца грамадска карыснай працай падчас навучальнага года. Працяглы час у рамках супрацоўніцтва з упраўленнем па працы, занятасці і сацыяльнай абароне Іўеўскага райвыканкама на базе школы арганізавана другасная занятасць навучэнцаў.
— Гэтай вясной старшакласнікі ўдзельнічалі ў высадцы святочных клумб. У цэлым жа работы на зямлі ў нас заўсёды шмат — той, што прыносіць не толькі эстэтычнае задавальненне, але і практычную карысць. На сваім вучэбна-доследным участку кожны год вырошчваем агародніну, якую выкарыстоўваем, каб істотна знізіць кошт харчавання, — далучаецца да размовы Алена Каспяровіч.
Не дзіўна, што такая атмасфера натхняе вучняў на працу і творчыя здзяйсненні. Увогуле, прыгажосць, створаная вакол, не можа не ўплываць на развіццё і светаадчуванне дзяцей.
— Нездарма кажуць: чалавека фарміруе асяроддзе. Творчыя падыходы ў афармленні школьнай тэрыторыі ў пэўнай ступені стымулююць вучняў да адпаведнага развіцця. Прывядзём лічбы: толькі за 2024 год нашы школьнікі заваявалі 28 грамат і дыпломаў у конкурсах творчай накіраванасці абласнога і рэспубліканскага ўзроўняў, — адзначае Ніна Тулько.
Мінулы навучальны год у Бабровіцкай сярэдняй школе скончыўся для 76 вучняў. Пяцёра сталі выпускнікамі і ў дзень развітання са школай унеслі свой уклад у добраўпарадкаванне яе тэрыторыі — пасадзілі дзявятую тую на алеі выпускнікоў.
— Сёння 28 нашых педагогаў імкнуцца не толькі даць дзецям веды, але і прывіць любоў да адукацыі. У мінулым навучальным годзе ў нас былі дзве групы педагагічнай накіраванасці. А дырэктарамі школ і іх намеснікамі працуюць 14 выпускнікоў нашай установы адукацыі, — падкрэслівае Ніна Іосіфаўна.
Кацярына МАЦЕВІЧ
Фота аўтара
