Урад працуе над павышэннем рэйтынгавых ацэнак беларускай эканомікі, заявіў Прэм’ер-міністр Беларусі Сяргей Румас на першым міжнародным дзелавым форуме Банка развіцця для замежных партнёраў “Скрыжаванне Беларусь” (BelarusCrossway’18).
“Лічу, што ў сучасных умовах Беларусь застаецца вельмі цікавым напрамкам на карце міжнароднага фінансавага бізнесу для многіх замежных крэдытораў і інвестараў. Мы актыўна працуем у напрамку павышэння рэйтынгавых ацэнак, пераходу ў больш высокую групу па краінавай класіфікацыі АЭСР. У бягучым годзе дабіліся пераходу з сёмай у шостую групу і не збіраемся спыняцца на дасягнутым. Сёння да Беларусі прыкавана ўвага многіх глабальных гульцоў фінансавай індустрыі, і з кожным праектам іх кола толькі пашыраецца”, — адзначыў Сяргей Румас.
У міжнародным дзелавым форуме BelarusCrossway’18 прынялі ўдзел прадстаўнікі многіх замежных банкаў і фінансавых кампаній, з якімі ў беларускага боку склаліся доўгія плённыя і ўзаемавыгадныя адносіны. “Лічу, што такія маштабныя мерапрыемствы павінны праводзіцца па ўсёй краіне сістэматычна. Новыя пункты росту і развіцця мы можам знайсці толькі сумеснымі намаганнямі”, — лічыць прэм’ер-міністр.
Паводле яго слоў, Беларусь заўсёды адкрыта да плённага канструктыўнага супрацоўніцтва ў любой сферы, у тым ліку ў фінансавай. “У Беларусі гістарычна склалася, што фінансавы і банкаўскі сектары заўсёды знаходзяцца на перадавой інавацыйных змяненняў у эканоміцы, нацыянальная фінансавая сістэма з’яўляецца адным з драйвераў росту і развіцця эканомікі”, — дадаў прэм’ер-міністр. Таму любыя праекты з прыцягненнем замежных пазыковых рэсурсаў перш за ўсё ацэньваюцца з пазіцыі вырашэння ключавых задач для эканомікі краіны: стварэння інавацыйных вытворчасцей, росту экспарту, узмацнення ролі малога і сярэдняга бізнесу.
Беларусь высока цэніць дзелавыя адносіны з даўнімі партнёрамі і дэманструе гатоўнасць да ўстанаўлення дзелавых сувязей з новымі партнёрамі. Беларускі бок нязменна будзе выбудоўваць дзелавыя адносіны на прынцыпах адкрытасці і празрыстасці, парытэту ўзаемных інтарэсаў і з улікам узаемнай выгады, рэзюмаваў прэм’ер-міністр.
