Нацыянальны студэнцкі форум “У аб’ектыве — моладзь!” адбыўся ў Оршы
Прынцып работы — адкрыты дыялог з лідарамі, лейтматыў самы сучасны — сацыяльныя сеткі, блогасфера і інтэрнэт: з розных куткоў краіны ў маладзёжную сталіцу Беларусі — 2019 з’ехаліся 170 удзельнікаў форуму, які праходзіў на базе Аршанскага дзяржаўнага механіка-эканамічнага каледжа.
— Такія мерапрыемствы вельмі важныя. У мінулым годзе ўзялі за аснову гэтую форму работы, правялі форум па валанцёрскай тэматыцы і адкрыты дыялог са студэнцкім актывам, — акцэнтаваў увагу ў гутарцы з журналістамі міністр адукацыі Рэспублікі Беларусь Ігар Карпенка. — Праз нацыянальныя студэнцкія форумы маладыя людзі маюць магчымасць данесці сваю пазіцыю адносна развіцця сістэмы адукацыі, яе ўтрымання і падрыхтоўкі спецыялістаў. Сістэмны дыялог у падобным фармаце адпавядае сучасным тэндэнцыям. Сёння немагчыма падрыхтаваць канкурэнтнага спецыяліста, калі студэнт не з’яўляецца актыўным суб’ектам адукацыйнага працэсу. Органы студэнцкага самакіравання з’яўляюцца акумулятарамі розных меркаванняў, моладзь іх аналізуе і мае магчымасць праз такія пляцоўкі даносіць сваю пазіцыю адносна зместу і далейшага развіцця сістэмы адукацыі. Наогул трэба сказаць, што студэнцкае самакіраванне — не сучасная вынаходка. Мы маем багаты вопыт яшчэ з савецкіх часоў, калі з’явілася норма, што ў склад вучоных саветаў універсітэтаў павінна ўключацца не менш за 25 працэнтаў студэнтаў, у нас яна таксама дзейнічае. А вучоны савет вызначае практычна ўсю жыццядзейнасць УВА: перспектывы і праграму развіцця, асноўныя напрамкі фінансавання, вучэбныя праграмы і пералік прадметаў, якія будуць фарміраваць падрыхтоўку па спецыяльнасці. Актыўны ўдзел студэнтаў не толькі ў выхаваўчых працэсах, але і вучэбных дае пазітыўны эфект стварэння спрыяльнай атмасферы паміж студэнтамі і выкладчыкамі. Гэта вельмі важна з пункту гледжання вырашэння тых задач і мэт, якія вызначае сёння вышэйшая школа.
Мы жывём у эпоху інфарматызацыі і лічбавізацыі. Аб’ём кантэнту, прадастаўленага ўвазе сучасніка, практычна невычарпальны. Студэнты — галоўныя драйверы ў трансфармацыі інфармавання і камунікацый, прадстаўнікі маладога пакалення першымі падхопліваюць трэнды інтэрнэт-асяроддзя і пачынаюць актыўна выкарыстоўваць іх у жыцці. Таму слоган форуму — “У аб’ектыве — моладзь!”, а галоўная ідэя — вывучэнне асаблівасцей маладзёжнага інфармавання ў інтэрнэце. Ініцыятыву стварэння маладзёжнага YouTube-канала падтрымала Міністэрства адукацыі Рэспублікі Беларусь. Для рэалізацыі праекта праведзены Першы адкрыты конкурс блогераў “Блогасфера 1.0”. Для ўдзелу было пададзена 184 заяўкі ад маладых людзей ва ўзросце ад 15 да 30 гадоў. Яны дасылалі відэа па сямі намінацыях, уключаючы навукова-папулярны і адукацыйны кантэнт, а таксама ролікі на тэмы падарожжаў, здароўя і прыгажосці. Адгукнуліся нават дзеці — яшчэ 26 заявак паступіла ад удзельнікаў 8—14 гадоў. На ўрачыстай цырымоніі адкрыцця форуму Ігар Карпенка ўручыў узнагароды самым актыўным студэнтам краіны за ўдзел у рэалізацыі маладзёжных ініцыятыў і сацыяльных праектаў, у падрыхтоўцы і правядзенні мерапрыемстваў, развіцці валанцёрскага руху, за выдатную вучобу і плённую грамадскую дзейнасць. Падзякай Міністэрства адукацыі Рэспублікі Беларусь адзначаны Уладзіслаў Шышко (Гродзенскі дзяржаўны медыцынскі ўніверсітэт), Вольга Русілка (Гродзенскі дзяржаўны ўніверсітэт імя Янкі Купалы), Аляксандр Давыдоўскі (Беларускі дзяржаўны педагагічны ўніверсітэт імя Максіма Танка). Заслужаныя ўзнагароды атрымалі таксама пераможцы конкурсу “Блогасфера 1.0”. Разам з імі — будучымі вядучымі блогерамі партала — міністр даў афіцыйны старт першаму айчыннаму маладзёжнаму YouTube-каналу.
— Сімвалічна, што нацыянальны студэнцкі форум праводзіцца ў маладзёжнай сталіцы Рэспублікі Беларусь, — падкрэсліў Ігар Карпенка. — За гэты год у Оршы адбылося мноства маладзёжных мерапрыемстваў, культурных і спартыўных падзей, рэалізаваны сур’ёзныя праекты. Горад, па сутнасці, стаў платформай для падтрымкі і развіцця маладзёжных ініцыятыў. Сёння важнае месца адводзіцца патрыятычнаму выхаванню моладзі, захаванню лепшых культурных і духоўных традыцый нашага народа. 2019 год праходзіў у нашай краіне пад знакам Года малой радзімы і 75-годдзя вызвалення Беларусі ад нямецка-фашысцкіх захопнікаў. Наша моладзь стала ініцыятарам шырокамаштабных патрыятычных акцый, былі запісаны сотні ўспамінаў ветэранаў і відавочцаў Вялікай Айчыннай вайны, якіх, на жаль, становіцца ўсё менш, створаны тэматычныя інтэрнэт-парталы, прадстаўлены серыі прэзентацый і біяграфічных нарысаў, разгорнута маштабная работа па рэканструкцыі помнікаў і месцаў пахавання загінуўшых воінаў, створаны цыклы тэлеперадач, напісаны дзясяткі кніг, вучэбных дапаможнікаў пра вайну, праведзены навуковыя канферэнцыі і шэраг іншых мерапрыемстваў. Несумненна, уся гэтая дзейнасць з’яўляецца яркім праяўленнем патрыятызму і непарыўнай сувязі пакаленняў. Валанцёрскі рух набыў асаблівы статус. Знакавай падзеяй для Беларусі сталі ІІ Еўрапейскія гульні. Больш за 8 тысяч студэнтаў прыняло ў іх удзел у якасці валанцёраў. Літаральна ўчора ў Студэнцкай вёсцы быў адкрыты Рэспубліканскі валанцёрскі цэнтр — ваша інтэрактыўная пляцоўка, якая будзе садзейнічаць стварэнню ўмоў для далейшага развіцця валанцёрскага руху і ў першую чаргу падтрымае вашы валанцёрскія ініцыятывы.
Кіраўнік ведамства падзякаваў моладзі за актыўны ўдзел у сёлетнім Форуме рэгіёнаў Беларусі і Расіі (Санкт-Пецярбург) і выказаў упэўненасць, што ўдзельнікі форуму ў Оршы далучацца да абмеркавання праекта стратэгіі развіцця маладзёжнай палітыкі да 2030 года, канцэптуальныя падыходы якой могуць быць уключаны і ў стратэгію маладзёжнай інтэграцыі Саюзнай дзяржавы, якая распрацоўваецца зараз, а таксама згадаў праект “Цягнік памяці і славы”, ініцыіраваны беларускай моладдзю. З пачатку новага года пачнецца інтэрнэт-адбор яго ўдзельнікаў — гэта каля 200 чалавек з Беларусі і Расіі. Цягнік пройдзе па маршруце першага цягніка з пераможцамі, што вярнуўся 25 чэрвеня 1945 года ў Маскву, і далей — да Уладзівастока.
— Сёння многа ідзе розных фэйкавых навін адносна інтэграцыйных працэсаў, — пракаменціраваў міністр. — Моладзі трэба разумець, што ніхто не збіраецца здаваць незалежнасць Беларусі, рабіць замах на яе суверэннае развіццё — кіраўнік дзяржавы не раз аб гэтым гаварыў. Але сёння інтэграцыя з’яўляецца асновай для ўзаемавыгаднага супрацоўніцтва, у першую чаргу гандлёва-эканамічнага, зняцця пэўных бар’ераў і перашкод, што замінаюць людзям і гандляваць, і ўзаемадзейнічаць, і кантактаваць. Безумоўна, інтэграцыйныя працэсы патрабуюць пэўнага пераасэнсавання — гэта адбываецца зараз на ўзроўні прэзідэнта і ўрада. У сваю чаргу мы разам з расійскімі калегамі многа ўвагі ўдзяляем пытанням гарманізацыі заканадаўчых актаў у галіне адукацыі і выхавання падрастаючага пакалення. Думаю, што рэальным укладам у развіццё Мэт устойлівага развіцця, сацыяльна-эканамічнага развіцця Беларусі і Расіі якраз і павінна стаць пляцоўка маладзёжнай інтэграцыі Саюзнай дзяржавы, таму што ў перспектыве вы будзеце не толькі ўдзельнічаць у гэтых працэсах, але і кіраваць, а ў некаторых выпадках — закладваць перспектыву іх развіцця.
Двухдзённая праграма форуму ўключала таксама адкрыты дыялог з міністрам адукацыі, метадычныя семінары для прарэктараў “Прававыя асновы выкарыстання інтэрнэт-прасторы” і “Сучасныя тэхналогіі медыякамунікацыі”, пасяджэнне Грамадскага рэспубліканскага студэнцкага савета, серыю тэматычных майстар-класаў, работу сцэнарнай групы, флэш-мобы, музычна-забаўляльныя мерапрыемствы, абмеркаванне канцэпцыі маладзёжнага YouTube-канала (першы яго выпуск выйдзе ў эфір у найбліжэйшы час і будзе прысвечаны падзеям форуму ў Оршы), прагляд відэаролікаў “У аб’ектыве — форум”.
У рамках рабочай паездкі на Віцебшчыну Ігар Карпенка таксама наведаў сярэднюю школу № 23 Оршы, азнаёміўся з вучэбна-метадычнай і матэрыяльна-тэхнічнай базай установы адукацыі, пагутарыў з выкладчыкамі і навучэнцамі.
Таццяна Бондарава.
Фота аўтара.
