Маладыя педагогі сталіцы падзяліліся эфектыўным вопытам
Падведзены вынікі гарадскога конкурсу прафесійнага майстэрства “Сталічны настаўнік — сталічнай адукацыі — 2018” у намінацыі “Мы — маладыя!”. Заснавальнікам конкурсу з’яўляецца камітэт па адукацыі Мінгарвыканкама пры падтрымцы Мінскай гарадской арганізацыі Беларускага прафесійнага саюза работнікаў адукацыі і навукі. Арганізатар мерапрыемства — Мінскі гарадскі інстытут развіцця адукацыі пры ўдзеле зацікаўленых арганізацый і асоб.
Конкурс прафесійнага майстэрства “Сталічны настаўнік — сталічнай адукацыі” праводзіцца з мэтай фарміравання прафесійных кампетэнцый у педагогаў, садзейнічання іх асобаснаму росту, раскрыцця іх творчага патэнцыялу. Конкурс — гэта натхненне, імкненне да новага, знаёмства і зносіны, бляск вачэй і радасць педагагічнага яднання. У конкурсах не проста ўдзельнічаюць, у іх пражываюць асаблівае жыццё. Яны даюць шанс раскрыцца, атрымаць карысны вопыт, падтрымку калег, знайсці аднадумцаў і сяброў.
Выпрабаванні пачаліся 30 студзеня і праходзілі ў тры туры. 81 малады педагог агульнаадукацыйных дысцыплін са стажам работы да трох гадоў прыняў удзел у складаных і вельмі цікавых мерапрыемствах. Сярод канкурсантаў былі 2 кандыдаты навук, 9 саіскальнікаў і магістрантаў, 1 аспірант, 4 стыпендыяты спецыяльнага фонду Прэзідэнта Рэспублікі Беларусь і ўладальнік гранта Мінгарвыканкама. Іх выступленні ацэньвала журы пад старшынствам начальніка аддзела дашкольнай, агульнай сярэдняй і спецыяльнай адукацыі камітэта па адукацыі Мінгарвыканкама. Сустаршыня журы — Сяргей Пятровіч Странкоўскі, першы прарэктар МГІРА, доктар гістарычных навук, дацэнт.
Юныя канкурсанты выступілі са стэндавай абаронай “Мая педагагічная знаходка”, падчас якой прадэманстравалі разнастайныя эфектыўныя метадычныя прыёмы. Педагогі правялі адкрытыя вучэбныя заняткі-нарыхтоўкі ў знаёмым і незнаёмым класах, прадставілі план правядзення і аналіз сваіх вучэбных заняткаў-нарыхтовак. Адукацыйныя відэаролікі “ТБ-педагогіка”, падрыхтаваныя канкурсантамі, не пакінулі гледачоў раўнадушнымі. Аўтары адукацыйных відэа давалі сваім калегам практычныя парады. Мнематэхніка, відэаскрайбінг, гульні-хадзілкі, прыём “Карусель” і дапаможнік “Вусень”, метад “Убачыць, перажыць і здзівіцца”, практыка-арыентаваныя задачы, тэхналогія праблемнага навучання, канструктары ўрока, дыферэнцыраваны падыход да навучання, фактары здароўезберажэння і сілавыя практыкаванні, а таксама міжпрадметныя сувязі і этапы даследчай дзейнасці — усё гэта было прапанавана педагогамі ў відэароліках, якія прыйшлі паглядзець многія іх калегі.
Фінальным выпрабаваннем конкурсу стала метадычная дэманстрацыя “Фрагмент урока (заняткаў). Мэтавызначэнне”.
***
Конкурс праводзіўся па дзевяці намінацыях.
- “Правільнае рашэнне” сярод настаўнікаў фізікі, астраноміі, матэматыкі, інфарматыкі. У ім перамагла Юлія Сяргееўна Якавенка, выкладчык фізікі Мінскага дзяржаўнага прафесійна-тэхнічнага каледжа лёгкай прамысловасці і бытавога абслугоўвання насельніцтва.
- “Калі цябе разумеюць” сярод настаўнікаў замежнай мовы. Пераможцай стала Наталля Сяргееўна Пятуніна, настаўніца нямецкай мовы гімназіі № 24 Мінска Цэнтральнага раёна.
- “Разумнае. Добрае. Вечнае” сярод настаўнікаў беларускай мовы і літаратуры, рускай мовы і літаратуры. У гэтай намінацыі перамагла Юлія Мікалаеўна Кузаўкова, настаўніца рускай мовы і літаратуры сярэдняй школы № 43 Мінска Заводскага раёна.
- “Пачатак пачаткаў” сярод настаўнікаў пачатковых класаў. Пераможца — Марыя Леанідаўна Быкоўская, настаўніца пачатковых класаў гімназіі № 29 Мінска Цэнтральнага раёна.
- “Свая вышыня” сярод настаўнікаў фізічнай культуры і здароўя, дапрызыўнай і медыцынскай падрыхтоўкі, працоўнага навучання і чарчэння. Лепшым стаў Раман Аляксандравіч Аўтушка, настаўнік фізічнай культуры і здароўя сярэдняй школы № 218 Мінска Маскоўскага раёна.
- “Мудрасць у абліччы прыгажосці” сярод настаўнікаў музыкі і мастацтва (айчынная і сусветная мастацкая культура). Перамагла Надзея Мікалаеўна Сокал, настаўніца музыкі гімназіі № 146 Мінска Маскоўскага раёна.
- “Вакол свету” сярод настаўнікаў гісторыі, грамадазнаўства, геаграфіі. Перамог Аляксандр Сяргеевіч Мархотка, настаўнік геаграфіі гімназіі № 43 Мінска Фрунзенскага раёна.
- “Звычайны цуд” сярод настаўнікаў хіміі, біялогіі. Лепшы — Яраслаў Яўгенавіч Гарбачоў, выкладчык біялогіі Мінскага дзяржаўнага прафесійна-тэхнічнага каледжа гандлю.
- “Дзяцінства. Творчасць. Развіццё” сярод выхавальнікаў устаноў дашкольнай адукацыі. Перамога за Любоўю Анатольеўнай Кірыковіч, выхавальніцайясляў-сада № 53 Мінска Заводскага раёна.
Пераможцы ў кожнай намінацыі гарадскога конкурсу прафесійнага майстэрства “Сталічны настаўнік — сталічнай адукацыі — 2018” у намінацыі “Мы — маладыя!” былі ўзнагароджаны ганаровымі граматамі камітэта па адукацыі Мінгарвыканкама.
Вынікі конкурсу падвёў першы намеснік старшыні камітэта па адукацыі Мінгарвыканкама Віталь Аляксандравіч Прыгодзіч.
Галоўным пераможцам гарадскога конкурсу прафесійнага майстэрства “Сталічны настаўнік — сталічнай адукацыі — 2018” у намінацыі “Мы — маладыя!” стала Юлія Сяргееўна Якавенка, выкладчык фізікі Мінскага дзяржаўнага прафесійна-тэхнічнага каледжа лёгкай прамысловасці і бытавога абслугоўвання насельніцтва. Яна была прадстаўлена да ўзнагароджання Ганаровай граматай Мінскага гарадскога Савета дэпутатаў і рэкамендавана да прысуджэння прэміі Мінгарвыканкама.
Надзея ЦЕРАХАВА.
Фота Алега ІГНАТОВІЧА.