Удзельнічаць у тэледэбатах будуць тры кандыдаты

- 12:12Выбары 2015

Удзельнічаць у тэледэбатах, якія запланаваны на 3 кастрычніка, будуць тры кандыдаты ў прэзідэнты. Такая інфармацыя агучана ў эфіры тэлеканала “Беларусь 1”.

У Белтэлерадыёкампанію паступілі заяўкі ад Сяргея Гайдукевіча, Таццяны Караткевіч і Мікалая Улаховіча. У адпаведнасці з пастановай Цэнтральнай камісіі па выбарах і правядзенні рэспубліканскіх рэферэндумаў, тэледэбаты могуць адбыцца, калі аб жаданні ўдзельнічаць у іх заявілі як мінімум два кандыдаты.
Тэледэбаты плануецца паказаць на тэлеканале “Беларусь 1” 3 кастрычніка (пачатак у 17.00), для гэтага даецца 60 хвілін эфірнага часу.
Раней старшыня ЦВК Лідзія Ярмошына выказала кандыдатам на вышэйшую дзяржаўную пасаду свае пажаданні адносна тэледэбатаў, удзельнічаць у якіх, на яе думку, вельмі складана. “Па сутнасці справы, выступленне па тэлебачанні, няхай і ў прамым эфіры, яно па-за канкурэнцыяй. Ты адзін, сам сабе задаеш пытанні і на іх адказваеш. Цябе ніхто не адцяняе і ніхто не націскае. На тэледэбатах трэба трымацца вельмі бойка, і там твая некампетэнтнасць (калі такая ёсць) на фоне астатніх можа саслужыць дрэнную службу”, – лічыць яна. “У тэледэбатах, вядома, акрамя ўпэўненасці ў сабе ў кандыдатаў павінна быць пачуццё самакрытыкі”, – адзначыла Лідзія Ярмошына.