Урок, які запомніцца

1 верасня ў Палаце прадстаўнікоў Нацыянальнага сходу Рэспублікі Беларусь адбыўся прафсаюзны ўрок “Беларусь — мая Айчына” для будучых педагогаў.

Навучэнцы другога курса Мінскага гарадскога педагагічнага каледжа сустрэліся з дэпутатамі Палаты прадстаўнікоў Нацыянальнага сходу Рэспублікі Беларусь, членамі Пастаяннай камісіі па адукацыі, культуры і навуцы Аксанай Уладзіміраўнай Няхайчык і Ірынай Аркадзьеўнай Дарафеевай, а таксама старшынёй Мінскай гарадской арганізацыі Беларускага прафсаюза работнікаў адукацыі і навукі Ларысай Леанідаўнай Волкавай.

Запрошаным на сустрэчу будучым настаўнікам пачатковых класаў падрабязна расказалі пра дзейнасць і прыярытэтныя напрамкі галіновага прафсаюза, зрабіўшы асаблівы акцэнт на рабоце з маладымі спецыялістамі.

— Наша непасрэдная задача — абарона правоў і інтарэсаў работнікаў галіны. Чаму сёння асаблівую ўвагу ў сваёй працы мы ўдзяляем менавіта моладзі? Справа ў тым, што да нас прыходзіць шмат маладых спецыялістаў, каля 640—650 чалавек штогод. За апошнія тры гады вырас працэнт маладых спецыялістаў, якія застаюцца ў галіне. Мы не саромеемся пра гэта казаць, таму што гэта сапраўды была бяда, калі 4 гады назад амаль 50% маладых спецыялістаў па розных прычынах сыходзілі з галіны, — паведаміла Ларыса Леанідаўна Волкава. — Ужо не для каго не сакрэт, што педагогі сёння дасягаюць пэўнага кар’ернага росту практычна ва ўсіх галінах. Толькі хіба што хірургамі не працуюць. Прэзідэнт нашай краіны — гісторык, два настаўнікі ў мінулым — міністры сёння, кіраўнікі сур’ёзных структур таксама маюць педагагічнае мінулае. Настаўнік можа вельмі шмат. І калі развіваць у сабе гэтую стараннасць, працавітасць, творчы і лідарскі патэнцыял, не баяцца набіваць шышкі, то дасягнуць можна вельмі многа.

Для навучэнцаў было вялікім гонарам не толькі ўпершыню пабываць у такім месцы, як Нацыянальны сход, але і пагутарыць з дэпутатамі. Разумеючы ступень занятасці гэтых людзей, моладзь была асабліва ўдзячна за праведзены разам з ёй час, цёплую, шчырую размову.

— Сёння ў парламенце 110 дэпутатаў, 39 з іх — педагогі: людзі, якія звязаны з выкладаннем у сярэдняй агульнаадукацыйнай школе, вышэйшых навучальных установах. Палітык сёння — гэта ў нейкай меры артыст, прамоўца, дыпламат. Улічваючы, якая колькасць педагогаў сёння ў парламенце, тое ж самае можна гаварыць і пра настаўніка, што ён і артыст, і прамоўца, і дыпламат. Гэтыя дзве сцежкі вельмі падобныя, — адзначыла Аксана Уладзіміраўна Няхайчык. — Хацелася б пажадаць вам як будучым педагогам, каб вы не спалохаліся першых цяжкасцей сваёй прафесіі. Калі на трэцім курсе ўніверсітэта моладзь часам заяўляе, што “гэта не маё”, то пытаюся: “А колькі ты працаваў па спецыяльнасці, каб зразумець, што гэта не тваё?” Каб гэта зразумець трэба “паварыцца” ў прафесіі. Вучоба — гэта адно, а праца — зусім іншае, зацягне — заўважыць не паспееце.

Напрыканцы прафсаюзнага ўрока для навучэнцаў Мінскага гарадскога педагагічнага каледжа правялі экскурсію па будынку парламента, прадаставілі магчымасць задаць прадстаўнікам улады любыя пытанні.

Марына ПЫРКОВА.
Фота аўтара.

Пакінуць каментарый

Ваш электронны адрас не будзе апублікаваны. Абавязковыя палі пазначаны *