Родныя твары настаўнікаў цяпер на білбордах ва ўсіх раённых цэнтрах Гомельшчыны. Выявы лепшых прадстаўнікоў педагагічнай галіны рэгіёнаў можна пабачыць на вуліцах населеных пунктаў. І вучні ў адказ усміхаюцца сваім настаўнікам, многіх з якіх ведалі не толькі яны самі, але і іх бацькі.
Раённыя камітэты прафсаюза сумесна з аддзеламі адукацыі, органамі выканаўчай улады прынялі рашэнне аб размяшчэнні білбордаў і ў хуткія тэрміны ўвасобілі ініцыятыву ў жыццё. На вялізных фотаздымках — прадстаўнікі педагагічных дынастый, выдатнікі адукацыі, якія маюць шматгадовы вопыт работы, зрабілі важкі ўклад у развіццё сістэмы адукацыі. Іх вучні неаднаразова станавіліся пераможцамі і прызёрамі раённых, абласных і рэспубліканскіх прадметных алімпіяд, міжнародных конкурсаў, атрымлівалі 100 балаў на цэнтралізаваным тэсціраванні…
Напрыклад, у Мазыры гэта Аляксей Баруноў — педагог дадатковай адукацыі Клуба юных пажарных. Выхаванцы Аляксея Валянцінавіча вядомы далёка за межамі нашай краіны. Хутка будзе 30 гадоў, як ён штодзень займаецца спартыўным праграмаваннем са школьнікамі. Многія з іх цяпер услаўляюць Беларусь на шматлікіх спаборніцтвах рэспубліканскага і міжнароднага ўзроўню.
У гарадскім пасёлку Акцябрскі з білборда ветліва глядзяць настаўніца фізікі Кацярына Сотчанка і яе дачка, настаўніца інфарматыкі Святлана Белая. Больш як 40 гадоў працоўны стаж Кацярыны Мікалаеўны. Яе муж Эдуард Сотчанка таксама працаваў педагогам. Іх дачка Святлана Эдуардаўна сёння — намеснік дырэктара ў сярэдняй школе № 1. Кацярына Сотчанка 7 гадоў назад пайшла на заслужаны адпачынак, але неўзабаве яе папрасілі вярнуцца. Пасля перапынку яна зноў з вучнямі. У гэтым навучальным годзе, акрамя гімназістаў, яна вучыць і школьнікаў сярэдняй школы № 2.
На білбордах у Гомелі — былыя педагогі гомельскай сярэдняй школы № 44 імя М.А.Лебедзева Міхаіл Прыбыткоў і Клара Рэзнікава. Яны абое ўдзельнічалі ў Вялікай Айчыннай вайне, а потым многа гадоў працавалі настаўнікамі. Клара Залманаўна і Міхаіл Васільевіч былі ініцыятарамі стварэння музея баявой і працоўнай славы, які па праве лічыцца цэнтрам ваенна-патрыятычнага выхавання моладзі Гомельшчыны. І хоць яны пайшлі ўжо з жыцця, справу выхавання падрастаючага пакалення на гераічных прыкладах мінулага працягваюць наступныя пакаленні педагогаў.
Дарэчы, першымі сваіх настаўнікаў яшчэ некалькі гадоў назад пачалі ўслаўляць на Жлобіншчыне. Сёлета на іх білбордах — прадстаўнікі сістэмы дадатковай адукацыі вялікага раёна Гомельшчыны.
Старшыня Гомельскага абласнога камітэта прафсаюза работнікаў адукацыі Мікалай Філіпцоў гаворыць, што сёння важна павышаць прэстыж работы педагога, прыцягваць увагу грамадскасці да ўкладу таленавітых, творчых настаўнікаў у развіццё іх рэгіёнаў. Нарэшце, менавіта такія адданыя сваёй прафесіі людзі з’яўляюцца прыкладам для маладых. Тых, хто толькі разважае над выбарам прафесіі.
Ірына АСТАШКЕВІЧ.