Ваенна-патрыятычны клуб «Пагранічнае братэрства» і музейная экспазіцыя «Генацыд беларускага народа» адкрыліся ў сярэдняй школе № 56 Мінска, паведамляе карэспандэнт «Настаўніцкай газеты».
У мерапрыемстве прынялі ўдзел першы намеснік старшыні камітэта па адукацыі Мінгарвыканкама Людміла Барысенка, першы намеснік пракурора Мінска Алег Аўдзей, дэпутат Мінгарсавета Ірына Дрозд.
Урачыстасць пачалася з унясення Дзяржаўнага сцяга Рэспублікі Беларусь і выканання Дзяржаўнага гімна. Прысутныя мінутай маўчання ўшанавалі памяць загінуўшых у гады Вялікай Айчыннай вайны.
Музейную экспазіцыю «Генацыд беларускага народа» прадставіў настаўнік гісторыі і грамадазнаўства Сяргей Палагін.
— Адкрыццё такой экспазіцыі неабходна ўсім нам, каб памятаць тую цану, якую давялося заплаціць беларусам за права жыць. Гэта неабходна, каб вы ведалі праўду пра падзеі Вялікай Айчыннай вайны і пранеслі яе праз гады. Маглі прывесці сюды на ўрок мужнасці першакласнікаў і перадаць яе будучым пакаленням, — адзначыў кіраўнік адміністрацыі Фрунзенскага раёна Сяргей Шкруднеў, звяртаючыся да вучняў і педагогаў.
Сцяг клубу ўручыў намеснік камандзіра вайсковай часткі 2007 падпалкоўнік Сяргей Чумак. Пасля гэтага больш за 20 школьнікаў прынеслі клятву, атрымалі пасведчанні і сталі паўнапраўнымі членамі клуба. Сярод навабранцаў — пераможцы і прызёры спаборніцтваў «Зарнічка», «Зарніца» і «Арляня», як выпускнікі, так і навучэнцы пачатковых класаў. Для старшакласнікаў — гэта дадатковая прафарыентацыя, а для зусім юных навучэнцаў — магчымасць азнаёміцца з пагранічнай справай, з яе перавагамі. Клубаўцам належыць даведацца больш з гісторыі нашай краіны, асвоіць азы ваеннай службы, навучыцца карыстацца зброяй і аказваць першую медыцынскую дапамогу.
Паказальнае выступленне роты ганаровай варты пагранічнай службы, майстар-клас па зборцы-разборцы аўтамата АК-74, выразнае чытанне верша аб бязлітаснай вайне, а таксама плац-парад членаў клуба сталі яркімі момантамі мерапрыемства.
Наталля КАЛЯДЗІЧ
Фота БелТА
