“Настаўніцкая газета” прапанавала сваім чытачам чарговы новы праект — “Профіль”. На яго старонках плануецца публікаваць матэрыялы, прысвечаныя асаблівасцям арганізацыі профільнага навучання ва ўстановах адукацыі розных рэгіёнаў нашай краіны.
Профільная адукацыя ўсё больш уваходзіць у жыццё сучаснага школьніка і сучаснай школы. Мы лічым, што гэты працэс будзе паступова развівацца. У профільных класах (групах) прафесійнай накіраванасці арганізавана вывучэнне асобных прадметаў, модуляў на павышаным узроўні і праводзяцца факультатыўныя заняткі, змест якіх звязаны з пэўным відам прафесійнай дзейнасці. Перспектывы ў профільнай адукацыі велізарныя. Выбіраючы профільны клас, навучэнцу важна не разгубіцца, выбраць профіль па душы і здольнасцях. Таму што ўжо сёння школьнік, магчыма, выбірае разам з профільным класам шлях у вялікае жыццё і будучую прафесію.
Прыемна ўсведамляць, што шырокае распаўсюджанне профільных класаў пачалося з класаў педагагічнай накіраванасці. Педагог працуе з будучыняй грамадства, таму ў педагогіку павінны ісці лепшыя з лепшых, матываваныя і мэтанакіраваныя абітурыенты. Менавіта таму ідэя адраджэння дзейнасці профільных класаў педагагічнай накіраванасці знайшла падтрымку на дзяржаўным узроўні. Так, у 2014 годзе Прэзідэнт Рэспублікі Беларусь А.Р.Лукашэнка ўхваліў прапанову вярнуць профільнае навучанне. А БДПУ выступіў з ініцыятывай увядзення профільнай педагагічнай падрыхтоўкі ў 10—11 класах. Пры наведванні педагагічнай УВА ў дзень стагадовага юбілею ўніверсітэта, 21 лістапада 2014 года, кіраўнік дзяржавы даў даручэнне разгледзець магчымасць увядзення асаблівага парадку прыёму ва ўстановы вышэйшай адукацыі для атрымання адукацыі па педагагічных спецыяльнасцях асоб, якія прайшлі навучанне ў профільных класах педагагічнай накіраванасці ўстаноў агульнай сярэдняй адукацыі. Так пачалася новая гісторыя профільных класаў у Беларусі.
Сто дарог — адна твая. Менавіта такі лозунг быў распаўсюджаны ў маім савецкім школьным дзяцінстве. Выпускніку і сёння адкрыты ўсе дарогі да набыцця запатрабаванай грамадствам прафесіі. Дзяржава прапануе маладому чалавеку неверагодны выбар. Педагагічныя і спартыўна-педагагічныя класы, інжынерныя і аграрныя, прававыя і ваенна-патрыятычныя, медыцынскія і іншыя. І гэта мы яшчэ не гаворым аб прэферэнцыях выпускнікам такіх класаў.
А яны немалыя. Як і ў мінулым годзе, для выпускнікоў профільных класаў прафесійнай накіраванасці захаваны дадатковыя магчымасці для паступлення. Абітуренты 2025 года — выпускнікі профільных класаў змогуць паступіць па субяседаванні на адпаведную спецыяльнасць педагагічнага, аграрнага, ваенна-патрыятычнага, спартыўна-педагагічнага, інжынернага напрамкаў. Для таго каб стаць студэнтам адпаведнай УВА без уступных выпрабаванняў, выпускнікам педагагічных, інжынерных, спартыўна-педагагічных і ваенна-патрыятычных профільных класаў трэба мець у дакуменце аб адукацыі адзнакі не ніжэйшыя за 8 па профільных і не ніжэйшыя за 7 па іншых вучэбных прадметах. А выпускнікам аграрных класаў па профільных прадметах наогул дастаткова 6 балаў. Акрамя таго, выпускнікам неабходна прадаставіць у прыёмную камісію рэкамендацыю педсавета ўстановы адукацыі, якую яны паспяхова скончылі, і прайсці субяседаванне.
На наш погляд, профільныя класы прафесійнай накіраванасці, акрамя таго, што арыентуюць заўтрашняга выпускніка на набыццё неабходнай дзяржаве і грамадству прафесіі, выконваюць яшчэ некалькі задач. Выбіраючы профільны клас, школьнік аналізуе свой патэнцыял, здольнасці і ўзровень ведаў. Ён развівае ў сабе стрэсаўстойлівасць і ўпэўненасць у сваіх сілах, напаўняе будзённае школьнае жыццё новымі цікавымі ведамі і знаёмствам з прафесіяналамі, якія, магчыма, стануць праз некалькі гадоў яго калегамі. І, нарэшце, школьнік робіць усвядомлены прафесійны выбар. А што можа быць важнейшым за тое, што ты сам выбіраеш сваю будучыню.
Фота на прэўю Алены КАСЬЯН-ПАЎЛЯНКОВАЙ
выкарыстоўваецца ў якасці ілюстрацыі
