Выхаванне без перапынку

Міністр адукацыі Ігар Карпенка прыняў удзел у адкрыцці ваенна-патрыятычнага лагера “Прызыўнік” для выхаванцаў Магілёўскага дзяржаўнага спецыяльнага прафесійна-тэхнічнага вучылішча закрытага тыпу № 2 дрэваапрацоўкі, які размясціўся на базе 5-й асобнай брыгады спецыяльнага прызначэння ў Мар’інай Горцы.

Як заўважыў кіраўнік ведамства, эфектыўнай формай патрыятычнага выхавання навучэнскай моладзі з’яўляюцца ваенна-патрыятычныя і абаронна-спартыўныя аздараўленчыя лагеры, спартыўныя гульні і спаборніцтвы па ваенна-прыкладных відах спорту і фізічнай падрыхтоўцы. Работа ў гэтым кірунку вядзецца пры цесным узаемадзеянні Міністэрства адукацыі з Міністэрствам абароны, Міністэрствам па надзвычайных сітуацыях, Міністэрствам унутраных спраў, Дзяржаўным пагранічным камітэтам Рэспублікі Беларусь.

Педагагічная формула “У выхавання няма канікул” стала добрай нагодай для арганізацыі ваенна-патрыятычных лагераў для непаўналетніх на базе злучэнняў і воінскіх часцей унутраных войскаў МУС. Вось і ў Мар’інай горцы 15 выхаванцаў за 10 дзён знаходжання ў лагеры “Прызыўнік” не толькі адпачнуць, але і атрымаюць першыя асновы вайсковай службы.

“У цесным узаемадзеянні з Міністэрствам абароны, камандаваннем 5-й асобнай брыгады спецыяльнага прызначэння арганізаваны гэты выдатны лагер. Сёння асабліва важна сфарміраваць у падрастаючага пакалення правільныя ўяўленні аб вайсковай службе і вайсковым абавязку. Адна з задач нашага лагера — матывацыя выбару ваеннай службы як грамадска значнага роду дзейнасці, — адзначыў Ігар Карпенка. — Гатоўнасць абараняць сваю радзіму ідзе з гістарычных народных глыбінь. Над нашай краінай прашумелі дзясяткі войнаў. Беларусы заўсёды абаранялі Радзіму і ўзнімалі яе з попелу. На змену воіну-абаронцу Айчыны, які абараніў родную зямлю на палях бітваў, прыходзілі хлебаробы і будаўнікі, якія адраджалі родныя гарады і вёскі, эканоміку і культуру. І менавіта ў стварэнні — вышэйшая філасофія патрыятызму нашага народа. Ва ўсе часы юнакоў спецыяльна выхоўвалі і рыхтавалі да ролі стваральнікаў і абаронцаў Радзімы, а дзяўчат — як натхняльніц на подзвіг сваіх блізкіх”.

Па словах міністра, важна выхоўваць маладое пакаленне на прыкладах гераічнай гісторыі Вялікай Айчыннай вайны. Кожнае новае пакаленне па-свойму асэнсоўвае старонкі ваеннай гісторыі. “Сёння важна зразумець падзеі ваеннага ліхалецця і захаваць памяць аб вялікім подзвігу нашага народа. 2021 год адзначаны журботнай датай — 80-й гадавінай нападу нямецка-фашысцкіх захопнікаў на нашу краіну, — адзначыў Ігар Карпенка. — Ведаць і памятаць аб Вялікай Айчыннай вайне — наш святы абавязак. І мы павінны зрабіць усё, каб на нашай зямлі не было войнаў”.

Юнакі ў лагеры аб’яднаны духам спаборніцтва, творчасці, наватарства. Лагер — гэта ў першую чаргу сяброўскія зносіны і станоўчыя эмоцыі, радасць адкрыццяў і знаходак, уменне змагацца і суперажываць. “Жадаю вам перамог у конкурсах, выдатнага настрою, дзіўных адкрыццяў, прыемных уражанняў і выдатных успамінаў пра лагер”, — пажадаў хлопцам міністр.

А для актыўнага адпачынку Ігар Карпенка падарыў юнакам спартыўны інвентар.

Як адзначылі ў Міністэрстве абароны, у лагеры хлопцы азнаёмяцца з жыццём і побытам спецназаўцаў, ваеннай тэхнікай і ўзбраеннем, гісторыяй паветрана-дэсантных войскаў. Таксама маладыя людзі пройдуць заняткі па прадметах баявой падрыхтоўкі, у тым ліку з выкананнем нарматываў па тактычнай, ваенна-медыцынскай падрыхтоўцы, ваеннай тапаграфіі, сувязі.

“Вам выпала ўнікальная магчымасць пабываць у гэтым легендарным злучэнні. Армія вучыць перамагаць, але самае галоўнае, чаму вучыць армія, гэта перамагаць самога сябе. Самая складаная перамога — гэта перамога над сабой. Упэўнены, што дні, праведзеныя ў лагеры, не пройдуць дарма. У будучыні гэта дапаможа вам зрабіць правільны выбар на карысць сваёй Радзімы, краіны”, — падкрэсліў памочнік міністра абароны па ідэалагічнай рабоце ва Узброеных Сілах, начальнік галоўнага ўпраўлення ідэалагічнай работы Міністэрства абароны генерал-маёр Леанід Касінскі.

У канцы змены юнакам трэба будзе здаць спецыяльныя нарматывы. За высокія паказчыкі яны будуць узнагароджаны падарункамі.

Па стане на 26 ліпеня ў 4874 аздараўленчых, спартыўна-аздараўленчых лагерах адпачылі 245 854 дзіцяці. У тым ліку 71 841 дзіця — у 843 кругласутачных лагерах. У 4031 дзённым лагеры адпачылі 174 013 дзяцей. У кожным аздараўленчым лагеры з дзённым і кругласутачным знаходжаннем запланаваны патрыятычныя тэматычныя змены з прыцягненнем вайсковых часцей, МУС, МНС, Мінабароны. У 164 кругласутачных аздараўленчых лагерах ваенна-патрыятычнага профілю за чэрвень — ліпень аздаравіліся больш за 11 тысяч дзяцей.

Вольга БАРЫСЕВІЧ.
Фота аўтара.