Выпускнікі гімназіі № 1 Горак прадэманстравалі стабальныя вынікі на сёлетнім цэнтралізаваным тэсціраванні.
Вікторыя Нявесценка і Станіслаў Бекараў заўсёды былі выдатнікамі вучобы. Атэстаты аб агульнай сярэдняй адукацыі ў іх асаблівага ўзору, маладыя людзі атрымалі залатыя медалі. Нядзіўна, што і на ЦТ учарашнія гімназісты праявілі сябе найлепшым чынам. Вікторыя набрала максімальныя 100 балаў па беларускай мове і біялогіі, а Станіслаў — па матэматыцы.
Па меркаванні Вікторыі Нявесценка, ніякага сакрэту, які прыводзіць да поспеху на тэсціраванні, не існуе. Патрэбны толькі ўласнае жаданне і плённая праца.
— Рыхтавалася да ЦТ старанна. Вельмі ўдзячна сваім школьным педагогам — настаўніцам беларускай мовы Ірыне Міхайлаўне Каралёвай, Алене Аляксандраўне Шкуратавай і настаўніцы біялогіі Таццяне Мікалаеўне Казловай. Яны далі мне сапраўды трывалыя веды. Гэтыя вучэбныя прадметы заўсёды былі для мяне любімымі, па беларускай мове даволі паспяхова ўдзельнічала ў алімпіядах. Падрыхтоўкай займалася шмат, таму стабальныя сертыфікаты не сталі для мяне нейкім сюрпрызам ці нечаканасцю. Спадзяюся, што добрыя вынікі на тэсціраванні, залаты медаль і атэстат з адзнакай дазволяць мне паступіць на жаданую спецыяльнасць, — падзялілася Вікторыя.
— Я таксама ішоў на тэсціраванне з канкрэтнай мэтай, планаваў набраць добрыя балы. Матэматыкай захапляюся с 1 класа, даўно ўдзельнічаю ў алімпіядным руху, быў нават прызёрам заключнага этапу рэспубліканскай алімпіяды. Некаторыя задачы на ЦТ выклікалі пытанні і сумненні, але з усімі заданнямі справіўся. Вынік, канечне, парадаваў. За свае веды вельмі ўдзячны настаўніцам пачатковых класаў Зінаідзе Васільеўне Лабанавай, Але Іванаўне Вараўка і асабліва — настаўніцы матэматыкі Наталлі Міхайлаўне Сенчанка. Дзякую за ўсебаковую падтрымку і кіраўніцтву нашай гімназіі, — адзначыў Стас Бекараў.
Падрыхтоўцы вучняў да здачы цэнтралізаванага тэсціравання ў Горацкім раёне ўдзяляюць вялікую ўвагу. Гэтая работа вядзецца планава і паступальна.
— На трэцяй ступені адукацыі абавязкова праводзім для навучэнцаў мерапрыемствы па прафесійным самавызначэнні. У нас вызначаны рэсурсныя цэнтры, апорныя ўстановы адукацыі па падрыхтоўцы да экзаменаў і тэсціравання. Там працуюць вопытныя педагогі-прадметнікі, якія кансультуюць па гэтых пытаннях калег і праводзяць заняткі для вучняў з усяго раёна. Якаснай падрыхтоўцы спрыяе і профільнае навучанне. Усё гэта ў сукупнасці прыносіць адпаведныя вынікі, — адзначыла галоўны спецыяліст аддзела па адукацыі Горацкага райвыканкама Іна Курціна.
Ганна СІНЬКЕВІЧ.
Фота Міхаіла ЛЯЎЦОВА.
