Выпрабаванні для майстроў

Удзельнікі руху WorldSkills крочаць па вялікім шляху да сусветных вяршынь. Зараз гэты шлях праходзіць праз абласны этап Рэспубліканскага конкурсу прафесійнага майстэрства. Першыя абласныя спаборніцтвы прайшлі на Гомельшчыне і Міншчыне. У хуткім часе абласныя старты адбудуцца ва ўсіх рэгіёнах краіны.

На Міншчыне вызначалі лепшых у вобласці па прафесійнай кампетэнцыі “Эксплуатацыя сельскагаспадарчых машын”. Спаборніцтвы прайшлі на базе Смілавіцкага сельскагаспадарчага прафесійнага ліцэя.

13 прадстаўнікоў устаноў адукацыі вобласці ўзялі ўдзел у конкурсе па  прафесіях трактарыст-машыніст сельскагаспадарчай вытворчасці, слесар па рамонце сельскагаспадарчых машын і абсталявання.

Конкурсныя іспыты патрабавалі правесці тэхнічнае абслугоўванне газаразмеркавальнага механізма і рэгуляванне паліўнай апаратуры рухавіка, падрыхтаваць да камплектавання і скамплекта­ваць ворны машынна-трактарны агрэгат.

Эксперты, якія ацэньвалі канкурсантаў, звярталі ўвагу на выкананне патрабаванняў аховы працы, санітарных норм і правіл, экалагічнай бяспекі, а таксама ўменне арганізаваць рабочае месца, працаваць з абсталяваннем і інструментам.

Па выніках конкурсу пераможцам стаў Мікалай Грыбко, навучэнец Смілавіцкага сельскагаспадарчага прафесійнага ліцэя.

Конкурс стаў не толькі захапляючым спаборніцтвам, але і прафарыентацыйным мерапрыемствам — за тым, як юнакі спрытна працуюць з тэхнікай, назіралі навучэнцы мясцовых школ.

Таксама на Міншчыне прайшлі абласныя спаборніцтвы па кампетэнцыях “Праграмнае рашэнне для бізнесу”, “Вэб-дызайн і распрацоўка”, “Графічны дызайн” і “Візуальны мерчандайзінг”.

Дар’я РЭВА.
Фота Марыі АРЭХ.