У панядзелак вечарам у Абу-Дабі стартуе чэмпіянат прафесійнага майстэрства WorldSkills Asia, і ў выставачным цэнтры Adnes, дзе будуць праходзіць спаборніцтвы, завяршаецца падрыхтоўка.
На кожнай конкурснай пляцоўцы — а спаборніцтвы арганізаваны па 21 кампетэнцыі (пераважна ІТ) — будуць абсталяваны месцы для кожнага канкурсанта, і тут сканцэнтруецца самае сучаснае абсталяванне ад вядучых сусветных вытворцаў. WorldSkills — гэта свайго роду “модны салон”, дзе можна ўбачыць найноўшыя ўзоры тэхнікі і тэхналогій.
У панядзелак, калі мантаж цалкам завершаць, канкурсанты наведаюць свае пляцоўкі, каб прыняць абсталяванне і дэталі, з якімі давядзецца працаваць. Гэта вельмі важны этап падрыхтоўкі да конкурсу, бо, калі нейкія хібы выявяцца падчас спаборніцтваў, іх, вядома, выправяць, але будзе страчаны час і парушаны тэмп работы. Таму кожны павінен уважліва абследаваць сваё працоўнае месца, каб яно было ідэальна падрыхтаванае да конкурсу. Акрамя таго, гэта дазволіць маладым людзям “абжыцца” на новым месцы і асвоіцца псіхалагічна.
Нацыянальныя эксперты хвалююцца за сваіх гадаванцаў, бо канкурэнцыя вельмі моцная. На адных пляцоўках з беларускімі канкурсантамі будуць спаборнічаць удзельнікі з Японіі, Германіі, ЗША, Кітая, Індыі, Малайзіі, Расіі, Інданезіі, Паўднёвай Карэі і іншых краін. Усе каманды прыехалі ў Абу-Дабі з сур’ёзнымі намерамі змагацца і перамагаць. У многіх свае сакрэты падрыхтоўкі, у тым ліку псіхалагічнай. Напрыклад, карэйцы пасяліліся літаральна за 5 хвілін хады ад выставачнага цэнтра Adnes (мы разам з прадстаўнікамі іншых краін жывём амаль за 50 км ад месца спаборніцтваў): рыхтуюцца псіхалагічна і шмат адпачываюць. Свая методыка падрыхтоўкі ёсць і ў расіян: яны ці не першыя вялікай камандай прыехалі ў Абу-Дабі, і з канкурсантамі пастаянна працуюць спецыялісты. Маленькія ж каманды, накшталт нашай, такой магчымасці пазбаўлены (эксперты з першага дня задзейнічаны на пляцоўках, і на дадатковую работу з удзельнікамі конкурсу проста не застаецца часу).
Эксперт у кампетэнцыі “Электроніка” спецыяліст прадпрыемства “Інтэграл” Леанід Цераховіч расказаў, што ўдзел у такіх конкурсах, як WorldSkills Asia, вельмі важны. Тут можна атрымаць аб’ектыўную ацэнку бягучых навыкаў, ведаў і вопыту навучэнцаў устаноў адукацыі і маладых спецыялістаў, што дапамагае арганізаваць вучэбны працэс больш якасна і ў адпаведнасці з сучаснымі стандартамі.
— Ад конкурсу мы чакаем новага карыснага вопыту, незалежную ацэнку кваліфікацыі нашага ўдзельніка, каб вызначыць кірункі далейшай падрыхтоўкі, — адзначыў Леанід Казіміравіч.
Адной з галоўных пераваг беларускага ўдзельніка ў кампетэнцыі “Электроніка” студэнта Мінскага дзяржаўнага радыётэхнічнага каледжа БДУІР Арцёма Семірэнкі эксперт назваў высокі ўзровень ведаў у праграмаванні ўбудаваных сістэм на мікракантролерах, а таксама ўнутраны спакой, ураўнаважанасць, уменне аператыўна і асэнсавана ацэньваць сітуацыю, а таксама працаваць у камандзе. Гэтыя якасці вельмі важныя ва ўмовах конкурсу.
Нашы ўдзельнікі расказваюць, што многа і рупліва рыхтаваліся. Напрыклад, студэнт Беларускай дзяржаўнай акадэміі сувязі Аляксей Крупскі выконваў розныя заданні з мінулых чэмпіянатаў, а потым аналізаваў іх са сваім выкладчыкам экспертам у кампетэнцыі “Вэб-дызайн і распрацоўка” Вольгай Рабычынай. А яшчэ ён наведваў курсы ў IТ-Academy, дзе атрымліваў дамашнія заданні рознай складанасці.
— Я хачу паглядзець, наколькі я моцны ці слабы, — прызнаецца Аляксей. — Адна справа — рыхтавацца дома, калі ніхто не перашкаджае, і зусім іншая — выконваць заданне на пляцоўцы. Хачу пагутарыць з удзельнікамі з іншых краін, даведацца, што яны могуць і як рыхтуюцца.
Ірына Царык, навучэнка мастацкага каледжа імя А.К.Глебава, — наша канкурсантка ў кампетэнцыі “Графічны дызайн”. Да спаборніцтваў дзяўчыну рыхтавала яе выкладчык эксперт у згаданай кампетэнцыі Таццяна Аляб’ева.
— Самая лепшая падрыхтоўка — практыка, — кажа дзяўчына. — Разам з Таццянай Віктараўнай мы бралі заданні WorldSkills за 2017 год і адпрацоўвалі пункт за пунктам, высвятлялі ўсе нюансы і незразумелыя моманты. Калі конкурсныя заданні нейкім чынам пераклікаліся з семестравымі праектамі, я старалася выкарыстоўваць конкурсныя крытэрыі. Па сутнасці, самае галоўнае — валодаць прафесійнай граматай і ўмець выконваць патрабаванні, а прыгожую абгортку нас навучылі рабіць яшчэ на першым курсе.
Ірына разлічвае, што конкурс у Абу-Дабі стане для яе добрай падрыхтоўкай да сусветнага чэмпіянату, які пройдзе ў будучым годзе ў Казані (Расія).
— Усё ж такі заданні будуць на англійскай мове, і замест Microsoft — iOS. Ды і ўмовы больш спартанскія: гэта ўжо не родная Беларусь, — разважае Ірына. — На конкурсе WorldSkills ты сам-насам з камп’ютарам, у абмежаваным часавым прамежку, з ледзянымі ад хвалявання рукамі — і ніхто не зробіць табе патуранне, бо ацэньваюць выключна тваю працу, а не цябе як “добрую дзяўчынку, давайце не будзем ёй ставіць дрэнную ацэнку”. Аднак я спадзяюся, што ўсё пройдзе добра, і наша беларуская каманда прывязе дадому перамогу.
Мы таксама спадзяёмся на годнае выступленне нашай зборнай у Абу-Дабі. У панядзелак увечары — урачыствае адкрыццё конкурсу, а ў аўторак пачнуцца спаборніцтвы. Трымаем кулачкі за нашых!
Галіна СІДАРОВІЧ,
Абу-Дабі.
Фота аўтара.
