Кожны вучань Кароцькаўскай сярэдняй школы развіваецца ў камфорных умовах. Педагогі, бацькі і прадстаўнікі падшэфнай арганізацыі ствараюць унікальнае асяроддзе для развіцця і навучання дзяцей, што дазваляе рабіць адукацыйны працэс больш захапляльным. Падрабязней — у матэрыяле карэспандэнта “Настаўніцкай газеты”.
Каб вучыць, трэба спачатку абнавіць: такога меркавання прытрымліваюцца ў Кароцькаўскай сярэдняй школе Кармянскага раёна імя П.П.Качуеўскага. Тэрыторыя ўстановы расцвітае і напаўняецца водарам кветак, фантан надае свежасці гэтаму кутку ведаў, а сучаснае абсталяванне садзейнічае паспяховай вучобе. Дырэктар Павел Уласаў падзяліўся дасягненнямі ў галіне добраўпарадкавання:
— Мы стараемся, каб першакласнікі пачыналі шлях да ведаў у сучасным асяроддзі. Новая мэбля і прыемныя тоны сцен адукацыйнай прасторы робяць заняткі яшчэ больш займальнымі і спрыяюць развіццю творчых здольнасцей нашых самых маленькіх вучняў.
Яшчэ ў гэтым годзе тут зрабілі рамонт у кабінеце фізікі, закупілі спецыялізаваную мэблю. Значныя пераўтварэнні закранулі і спартыўную залу, якая цяпер стала больш камфортнай і сучаснай. У планах — зрабіць лінгафонны кабінет для вывучэння замежных моў, каб выкарыстоўваць гукавое і мультымедыйнае абсталяванне для рэалізацыі аўдыявізуальнага метаду навучання.
— На капітальны рамонт спартыўнай залы было выдзелена з бюджэту каля 90 тысяч рублёў. Раздзявалкі і душавыя абсталёўвалі за кошт пазабюджэту. Адной з крыніц даходу стала рэалізацыя багатага ўраджаю з прышкольнага ўчастка: агародніны, ягад і расады. Рэалізацыя экалагічна чыстай прадукцыі, вырашчанай вучнямі і педагогамі, аказалася найбольш прыбытковай. У рамках другаснай занятасці навучэнцы вырабілі драўляныя рашоткі для радыятараў, якія зараз надаюць памяшканню завершаны, стыльны выгляд, робяць інтэр’ер спартыўнай залы больш гарманічным, — дадае суразмоўнік. — Да таго ж мы атрымалі значную фінансавую падтрымку ад шэфаў і бацькоў нашых вучняў, якія дапамаглі абнавіць матэрыяльную базу. Шэфы школы штогод прэзентуюць партфелі першакласнікам, і кожны раз гэтая падзея становіцца сапраўдным святам, поўным радасці і ўсмешак. На працягу навучальнага года яны таксама становяцца арганізатарамі пазнавальных экскурсій па ваенных музеях і мемарыяльных комплексах Беларусі, уручаюць падарункі школьнікам на Новы год і выпускны. Таксама яны клапоцяцца аб аснашчэнні ўстановы. Так, у нас з’явіўся новы тэлевізар, мэбля ў сталовай і настаўніцкай. Да Дня ведаў нашы ганаровыя госці зрабілі цудоўны падарунак — новы спартыўны інвентар, які дапаможа вучням расці моцнымі і здаровымі.
У гэтым навучальным годзе школу наведваюць 60 вучняў, з іх 8 — першакласнікі. Дарэчы, выпускнікоў таксама было 8 чалавек, і ўсе яны паспяхова паступілі ў вышэйшыя і сярэднія спецыяльныя навучальныя ўстановы краіны.
— Калектыў вельмі рады, што нашы намаганні прыносяць плён. Настаўнікі і далей будуць натхняць дзяцей, перадаваць ім свой вопыт, каб тыя смела ішлі да новых вышынь, — падсумаваў Павел Уладзіміравіч.
Алена КАСЬЯН-ПАЎЛЯНКОВА
Фота аўтара
