Студэнты Белдзяржуніверсітэта распрацавалі карпаратыўны каляндар
Праект прымеркавалі да 100-годдзя БДУ, якое вядучы ўніверсітэт краіны адзначыць у кастрычніку новага года.
Як паведамілі ў прэс-службе, студэнцкі карпаратыўны каляндар — гэта плён сумеснай творчасці навучэнцаў усіх факультэтаў і адукацыйных інстытутаў, а таксама юрыдычнага каледжа і Ліцэя Белдзяржуніверсітэта. Нездарма ён мае назву “Кожны з нас — БДУ!”. На кожнай старонцы — студэнты, якія дасягнулі паспехаў у навуковым, грамадскім, культурным і спартыўным жыцці ўніверсітэта. Усе фотаздымкі для календара зроблены ў інтэр’ерах БДУ.
Галоўная задума — паказаць разнастайнасць спецыяльнасцей і навуковых школ універсітэта, раскрыць прывабнасць актыўнага студэнцкага жыцця. Стваральнікі календара пастараліся перадаць свае эмоцыі ў сувязі з кожным месяцам года. Так, натуральная прыгажосць студзеня адлюстроўвае спецыфіку хімічнага факультэта і факультэта геаграфіі і геаінфарматыкі, а малады рамантычны сакавік мае ласку да біялагічнага факультэта і МДЭІ імя А.Д.Сахарава.
На прэзентацыю календара стваральнікі запрасілі рэктара БДУ Андрэя Караля. Андрэй Дзмітрыевіч падзяліўся ўражаннямі і адзначыў, што лозунг “Кожны з нас — БДУ!” выбраны ўдала. У ім закладзена адзінства разнастайнасці ўніверсітэта і ўзаемасувязь асабістых мэт з карпаратыўнымі. Рэктар падзякаваў удзельнікам праекта за творчы падыход у адлюстраванні яркіх фрагментаў універсітэцкага жыцця.
Напрыканцы імпрэзы студэнты падарылі рэктару каляндар са сваімі аўтографамі і навагоднімі пажаданнямі. У сваю чаргу Андрэй Кароль ўручыў студэнтам сертыфікаты, якія пацвярджаюць іх асабісты ўклад у рэалізацыю праекта. Акрамя таго, студэнты абмеркавалі з рэктарам пытанні ўзаемадзеяння факультэтаў, рэалізацыі маладзёжных ініцыятыў і ўніверсітэта будучыні.
Падрыхтавала Галіна СІДАРОВІЧ.
Фота прадастаўлена прэс-службай БДУ.