На пасяджэнні выніковай калегіі Міністэрства адукацыі словы ўдзячнасці за плённую работу прагучалі ў адрас педагогаў. Міністр адукацыі Андрэй Іванец уручыў калектывам устаноў адукацыі заслужаныя ўзнагароды, паведамляе карэспандэнт “Настаўніцкай газеты”.
Па выніках работы галіны за 2024 год граматай Міністэрства адукацыі і пераходзячым сімвалам якасці “Лепшы ў адукацыі” адзначаны галоўнае ўпраўленне адукацыі Гомельскага аблвыканкама (у намінацыі “Лепшае структурнае падраздзяленне абласнога (Мінскага гарадскога) выканаўчага камітэта, якое ажыццяўляе дзяржаўна-ўладныя паўнамоцтвы ў сферы адукацыі”), а таксама ўпраўленне адукацыі Лідскага райвыканкама Гродзенскай вобласці (у намінацыі “Лепшае структурнае падраздзяленне гарадскіх, раённых выканаўчых камітэтаў, мясцовых адміністрацый раёнаў у гарадах, якія ажыццяўляюць дзяржаўна-ўладныя паўнамоцтвы ў сферы адукацыі”).
Лепшай установай дашкольнай адукацыі, якая размешчана ў гарадской мясцовасці, стаў дашкольны цэнтр развіцця дзіцяці № 8 Магілёва, а лепшай установай, размешчанай у сельскай мясцовасці, — Заслонаўскі дзіцячы сад Лепельскага раёна Віцебскай вобласці.
Сярод устаноў агульнай сярэдняй адукацыі лепшымі прызнаны сярэдняя школа № 18 Баранавіч Брэсцкай вобласці і Сноўская сярэдняя школа Нясвіжскага раёна Мінскай вобласці.
У намінацыі “Лепшая ўстанова спецыяльнай адукацыі” адзначаны Мінскі гарадскі цэнтр карэкцыйна-развіццёвага навучання і рэабілітацыі.
Лідарамі сярод устаноў дадатковай адукацыі дзяцей і моладзі сталі Ваўкавыскі цэнтр творчасці дзяцей і моладзі Гродзенскай вобласці і Уваравіцкі цэнтр дзіцячай творчасці Буда-Кашалёўскага раёна Гомельскай вобласці.
Сімвалам якасці “Лепшы ў адукацыі” ўзнагароджаны Мінскі дзяржаўны каледж сферы абслугоўвання (у намінацыі “Лепшая ўстанова адукацыі, якая рэалізуе адукацыйныя праграмы сярэдняй спецыяльнай адукацыі”) і Капыльскі дзяржаўны каледж (у намінацыі “Лепшая ўстанова адукацыі, якая рэалізуе адукацыйныя праграмы прафесійна-тэхнічнай адукацыі”).
У намінацыі “За высокія дасягненні ў галіне якасці адукацыі” перамогу святкуе Гродзенскі дзяржаўны ўніверсітэт імя Янкі Купалы, а ў намінацыі “Лепшая арганізацыя ў галіне ажыццяўлення навуковай і навукова-тэхнічнай дзейнасці” — Брэсцкі дзяржаўны тэхнічны ўніверсітэт.
Віншуем пераможцаў!
Наталля КАЛЯДЗІЧ
Фота Алега ІГНАТОВІЧА
