Задача праверак — не проста выяўляць, але і ўстараняць парушэнні

Пры правядзенні праверачных мерапрыемстваў па пытаннях функцыянавання аграпрамысловага комплексу перад кантралёрамі стаіць задача не толькі выяўлення парушэнняў, але і іх устаранення ў самыя кароткія тэрміны. Аб гэтым заявіў генеральны пракурор Аляксандр Канюк у час наведвання круглянскай сярэдняй школы № 2.

“Кіраўніком дзяржавы нам даручана дасканала праверыць сельскагаспадарчыя арганізацыі АПК краіны і строга рэагаваць на ўсе факты нядбайнасці, разбазарвання і крадзяжу маёмасці. Пры гэтым наша галоўная задача — не проста выяўляць, але і ўстараняць усе выяўленыя парушэнні ў самыя кароткія тэрміны”, — падкрэсліў Аляксандр Канюк.

Генпракурор заўважыў, што пракурорскі нагляд за работай АПК вядзецца пастаянна. Пытанні забеспячэння захаванасці дзяржаўнай уласнасці, выплаты заработнай платы, выканання рабочай і тэхналагічнай дысцыпліны ў пракурораў у аснове. “І будучая пасяўная — гэта таксама наш галоўны клопат. Але важна, і я папярэдзіў на нарадзе рабочай групы 4 красавіка пракурораў і іншыя ведамствы, каб праверкамі не перашкодзілі пасяўной, а было ўсё зроблена акуратна і ва ўзаемасувязі”, — сказаў Аляксандр Канюк.

Як паведамлялася, для правядзення праверачных мерапрыемстваў па пытаннях функцыянавання АПК створана рабочая група, у склад якой увайшлі прадстаўнікі Камітэта дзяржкантролю, Генеральнай пракуратуры, МУС і Следчага камітэта. Аналагічныя групы створаны ў абласцях. Яны пачалі ўжо вывучэнне сітуацыі ў сельгасарганізацыях. Мерапрыемствы будуць праводзіцца ў форме маніторынгаў. Асноўны акцэнт правяраючыя зробяць на праблемных пытаннях, агучаных на рэспубліканскім семінары-нарадзе аб развіцці вёскі і павышэнні эфектыўнасці аграрнай галіны краіны.

Нараўне з кантролем за гатоўнасцю гаспадарак да правядзення вясенняй сяўбы і арганізацыяй пасяўной кампаніі будуць вывучаны пытанні эфектыўнага выкарыстання матэрыяльна-тэхнічнай базы гаспадарак (тэхнікі, сельгасаб’ектаў), навядзення парадку на зямлі, недапушчэння фактаў прыпісак, своечасовасці выплаты заработнай платы работнікам, захаванасці паліва і інш.